«Бек тўпи» савдо мажмуаси собиқ директори Шукруллахон Эргашев Ички ишлар вазирлигининг жазони ижро этиш бош бошқармасининг 1-изоляторида вафот этди. Бу ҳақда «Дарё»га Бош прокуратура матбуот хизмати хабар берди.
2019 йил 30 март куни соат тахминан 12:20ларда Ўзбекистон Республикаси ИИВ ЖИЭББга қарашли 1-сон тергов ҳибсхонасида сақланаётган, 2019 йилнинг 6 февралидан бошлаб ҳибсхонанинг Даволаш-профилактик ёрдам кўрсатиш бўлимида «Юрак ишемик касаллиги, зўриқиш стенокардияси, гипертония-2, АГ-2, қандли диабет касаллиги 2-даражаси» ташхиси билан даволанаётган махбус Шукруллахон Эргашев «Ўткир миокард инфаркт, Ўткир юрак қон томир ва ўпка етишмовчилиги» ташхиси билан вафот этган, дейилади хабарда.
Маҳбус Шукруллахон Эргашевнинг ўлими сабабларини аниқлаш мақсадида судга оид тиббиёт экспертизаси тайинланган. Ҳозирда ушбу ҳолат бўйича Қамоққа олинганларни сақлаш ва жазони ижро этиш жойларида қонунларга риоя этилиши устидан назорат бўйича Тошкент прокуратураси томонидан терговга қадар текширув ҳаракатлари ўтказилмоқда.
Изоҳ (0)