Қамчиқ довонидан ўтувчи «Фарғона ҳалқа йўли» автомобиль йўлида икки жойда ҳайдовчилар учун кичик қаҳвахоналар ташкил этилди. Бу ҳақда «Дарё»га Наманган вилоят ИИБ ЙҲХБ матбуот гуруҳи маълум қилди.
— Мақсад узоқ масофадан, айниқса тунги вақтда келаётган ҳайдовчилар ҳушёрлигини ошириш, чарчоқ аломати сезилганда тетиклаштиришдан иборат. Уларга ушбу қаҳвахоналарда бепул равишда қайноқ қаҳва ва чой таклиф этилмоқда, — дейди гуруҳ катта инспектори Шокиржон Ҳошимов.
Биринчиси Тошкент — Ўш йўлининг 221-километридаги назорат масканида, иккинчиси Наманган мунтазам йўл-патруль хизмати масканида ташкил этилган қаҳвахоналарда йўл-транспорт ҳодисалари оқибатлари акс этган видеолавҳалар намойиши ҳам йўлга қўйилди.
Эслатиб ўтамиз, олдинроқ вилоятнинг Тўрақўрғон туманида «Навбаҳор» мухлислари бўлган машина иштирокидаги автоаварияда 4 киши, Поп туманидаги ЙТҲда эса 5 киши (улардан 4 нафари бир оила аъзолари) ҳалок бўлгани билдирилганди.
Изоҳ (0)