Бу йилги Наврўз байрами Тошкент вилоятининг Чиноз тумани, «Яхши ният» маҳалласи аҳолиси ёдида узоқ вақт қоладиган бўлди. Қишлоқда туғилиб, камолга етган икки карра Меҳнат Қаҳрамони Турсуной Охунова шарафига барпо қилинган хотира майдони давлат раҳбари топшириғига биноан ободонлаштирилиб, маънавият масканига айлантирилди. Бу ҳақда «Дарё»га «Халқ билан мулоқот» гуруҳи маълум қилди.
Турсуной Охунова бюсти реставрация қилиниб, хотира майдони қайта қурилди, қаровсиз қолиб кетган музей тикланиб, маданият марказига айлантирилди. Шу муносабат билан «Яхши ният» маҳалласидаги мазкур масканда ўтган тадбирда уч авлод вакиллари бир нуқтада жам бўлди.
Тадбирда Турсуной Охунова ҳаёти ва фаолияти билан боғлиқ ибратли хотиралар ёдга олинди. Бюст пойи гулларга бурканди. Бу ҳудудда шу пайтга қадар сайлгоҳ ёки хиёбон бўлмаган. Ана шундай хайрли ташаббус натижасида катта ҳаётга қадам қўяётган ёш оилаларнинг унутилмас онлари янада файзли ўтадиган бўлди.
Мазкур мажмуанинг яна бир аҳамиятли жиҳати бу ерда ҳудуддаги таълим муассасалари ўқувчилари учун очиқ дарслар ўтказиш учун ҳам имконият ва шароит яратилгани билан боғлиқ.
Бу ердаги музей оддий деҳқон фарзандининг ҳаёт йўлидан сўзлайди. Биринчи ўзбек механизатор аёли Турсуной Охунова машаққатли меҳнати, иродаси, қатъияти ва камтарлиги туфайли эл-юрт ҳурматини топди. Буни музейга қўйилган суратлардан ҳам пайқаш қийин эмас.
Мазкур масканни кенг қамровли маърифат марказига — ёшларни камолга етказадиган йирик мажмуага айлантириш режалаштирилмоқда. Музей биносида тез кунда мусиқа ва шахмат тўгараклари иш бошласа, кўп ўтмай атрофдаги ерлар ҳам ободонлаштирилиб, хиёбон, сунъий футбол майдони, мўъжаз кутубхоналар барпо қилинади.
Изоҳ (0)