«Нодирабегим ролида ёш актриса Райҳон Асатова» «Қўқон шамоли» тарихий фильмида бош ролларни кимлар ижро этиши маълум бўлди (фото)

«Ўзбеккино» буюртмасига биноан продюсер Маҳмуд Эркабоев ва режиссёр Дилмурод Масаидов  томонидан суратга олинаётган «Қўқон шамоли» номли тарихий фильмнинг бош рол ижрочилари тасдиқланди.

Бу ҳақда фильм режиссёри Дилмурод Масаидов журналист Феруз Муҳаммадга берган интервьюсида маълум қилди.

Режиссёр Дилмурод Масаидов фильмнинг дастлабки тайёргарликлари ҳақида қуйидаги маълумотларни тақдим этди.

‘Қўқон шамоли’ тарихий фильмининг сценарийси 2018 йилнинг июль ойида ‘Ўзбеккинo’МА бадиий кенгашидан ўтган эди. Фильм сценарийси тасдиқланганидан сўнг, продюсер Маҳмуд Эркабоев билан фильмнинг дастлабки тайёргарлик ишларига киришдик. Фильмга тайёргарлик ишлари 6-7 ой давом этди. Шу вақт мобайнида фильм суратга олинадиган объектлар ўрганилди, тарихий костумлар тайёрланди ҳамда актёр ва актрисаларнинг фото ҳамда видео синов жараёнлари бўлиб ўтди.

Дилмурод Масаидов, «Қўқон шамоли» фильмининг режиссёри

«Қўқон шамоли» тарихий фильмида фото синовдан муваффақиятли ўтмай, видео синовда маҳоратини кўрсатган ёш актриса Нодирабегим ролига тасдиқлангани маълум бўлди.

Фильмнинг фото ҳамда видео синов ишларига профессионал ҳамда ҳаваскор юздан ортиқ актёр ва актрислар иштирок этишди. ‘Қўқон шамоли’ фильмининг фотосинов жараёнларида Нодирабегим роли учун Дилноза Кубаева, Шаҳзода Матчонова, Севара Солиева, Асал Шодиева, Шаҳло Темирова, Феруза Норматова, Наргиза Абдуллаева каби таниқли ва профессионал актрислардан токи ҳаваскор актрисаларгача, жами бўлиб элликдан ортиқ актрисалар иштирок этишди.

‘Қўқон шамоли’ фильмидаги Нодирабегим образини ёш актриса Райҳон Асатова ижро этадиган бўлди. Очиғи Райҳон Асатова фото синовларда у қадар ўзини намоён қила олмади. Аммо видео синовлар натижасида ўзини ушбу ролга муносиб эканлигини исботлади.

Дилмурод Масаидов, «Қўқон шамоли» фильмининг режиссёри

Фильмдаги бош роллар Амир Умархон ҳамда Амир Олимхон ролларини ижро этадиган актёрлар ҳам қизғин муҳокамалар билан тасдиқлангани маълум бўлди.

Фильмдаги Амир Умархон ролига камида 30-40 маҳоратли ва таниқли актёрлар фото ва видео синовлар топширишди. Ушбу жараёнда қизиқ бир ҳолат юз берди. Яъни фильмда Амир Умархон ролини Бобур Йўлдошев, Амир Олимхон ролини эса Илҳом Бердиев ижро этишига тўхталган эдик. Аммо видео синовдан сўнг актёрларнинг ўрни алмашиб, Бобур Йўлдошев Амир Олимхонни, Илҳом Бердиев эса Амир Умархон ролига тасдиқланди.

Дилмурод Масаидов, «Қўқон шамоли» фильмининг режиссёри

Режиссёр Дилмурод Масаидов «Қўқон шамоли» фильми учун кастингдан ўтган актёр ва актрисаларга «Ўзбеккино» МА бадиий кенгашининг муносабати ҳақида гапирди.

Фильмнинг фото ҳамда видео синов жараёнидаги лавҳаларни ‘Ўзбеккинo’ МА бадиий кенгашига ҳавола этганимизда, улар ҳам бир овоздан фильмдаги асосий ролларга тасдиқланган актёр ва актрисаларни маъқуллашди.

Айни кунларда ‘Қўқон шамоли’ фильмининг сўнгги тайёргарлик жараёнлари бўлиб ўтмоқда. Фильмнинг суратга олиш ишлари 2019 йилнинг апрель ойининг ўрталарида бошланиши режалаштирилмоқда.

Дилмурод Масаидов, «Қўқон шамоли» фильмининг режиссёри

Маълумот учун, Зебо Қобилованинг «Айбсиз айбдор» деб номланган сценарийси асосида продюсер Маҳмуд Эркабоев ҳамда режиссёр Дилмурод Масаидовлар томонидан «Қўқон шамоли» деб номланган тарихий фильмни суратга олмоқда. Фильм Қўқон хонлигининг XVIII аср охири — XIX аср бошларидаги ижтимоий-сиёсий ҳамда адабий муҳити, ўша давр чигалликлари ҳақида бўлиб, асосан Қўқон хони Умархон ҳамда шоира Нодирабегим ҳаётидан ҳикоя қилади.