“Nodirabegim rolida yosh aktrisa Rayhon Asatova”. “Qo‘qon shamoli” tarixiy filmida bosh rollarni kimlar ijro etishi ma’lum bo‘ldi (foto)

“O‘zbekkino” buyurtmasiga binoan prodyuser Mahmud Erkaboyev va rejissor Dilmurod Masaidov  tomonidan suratga olinayotgan “Qo‘qon shamoli” nomli tarixiy filmning bosh rol ijrochilari tasdiqlandi.

Bu haqda film rejissori Dilmurod Masaidov jurnalist Feruz Muhammadga bergan intervyusida ma’lum qildi.

Rejissor Dilmurod Masaidov filmning dastlabki tayyorgarliklari haqida quyidagi ma’lumotlarni taqdim etdi.

‘Qo‘qon shamoli’ tarixiy filmining ssenariysi 2018-yilning iyul oyida ‘O‘zbekkino’ MA badiiy kengashidan o‘tgan edi. Film ssenariysi tasdiqlanganidan so‘ng, prodyuser Mahmud Erkaboyev bilan filmning dastlabki tayyorgarlik ishlariga kirishdik. Filmga tayyorgarlik ishlari 6-7 oy davom etdi. Shu vaqt mobaynida film suratga olinadigan obyektlar o‘rganildi, tarixiy kostumlar tayyorlandi hamda aktyor va aktrisalarning foto hamda video sinov jarayonlari bo‘lib o‘tdi.

Dilmurod Masaidov, “Qo‘qon shamoli” filmining rejissori

“Qo‘qon shamoli” tarixiy filmida foto sinovdan muvaffaqiyatli o‘tmay, video sinovda mahoratini ko‘rsatgan yosh aktrisa Nodirabegim roliga tasdiqlangani ma’lum bo‘ldi.

Filmning foto hamda video sinov ishlariga professional hamda havaskor yuzdan ortiq aktyor va aktrislar ishtirok etishdi. ‘Qo‘qon shamoli’ filmining fotosinov jarayonlarida Nodirabegim roli uchun Dilnoza Kubayeva, Shahzoda Matchonova, Sevara Soliyeva, Asal Shodiyeva, Shahlo Temirova, Feruza Normatova, Nargiza Abdullayeva kabi taniqli va professional aktrislardan toki havaskor aktrisalargacha, jami bo‘lib ellikdan ortiq aktrisalar ishtirok etishdi.

‘Qo‘qon shamoli’ filmidagi Nodirabegim obrazini yosh aktrisa Rayhon Asatova ijro etadigan bo‘ldi. Ochig‘i Rayhon Asatova foto sinovlarda u qadar o‘zini namoyon qila olmadi. Ammo video sinovlar natijasida o‘zini ushbu rolga munosib ekanligini isbotladi.

Dilmurod Masaidov, “Qo‘qon shamoli” filmining rejissori

Filmdagi bosh rollar Amir Umarxon hamda Amir Olimxon rollarini ijro etadigan aktyorlar ham qizg‘in muhokamalar bilan tasdiqlangani ma’lum bo‘ldi.

Filmdagi Amir Umarxon roliga kamida 30-40 mahoratli va taniqli aktyorlar foto va video sinovlar topshirishdi. Ushbu jarayonda qiziq bir holat yuz berdi. Ya’ni filmda Amir Umarxon rolini Bobur Yo‘ldoshev, Amir Olimxon rolini esa Ilhom Berdiyev ijro etishiga to‘xtalgan edik. Ammo video sinovdan so‘ng aktyorlarning o‘rni almashib, Bobur Yo‘ldoshev Amir Olimxonni, Ilhom Berdiyev esa Amir Umarxon roliga tasdiqlandi.

Dilmurod Masaidov, “Qo‘qon shamoli” filmining rejissori

Rejissor Dilmurod Masaidov “Qo‘qon shamoli” filmi uchun kastingdan o‘tgan aktyor va aktrisalarga “O‘zbekkino” MA badiiy kengashining munosabati haqida gapirdi.

Filmning foto hamda video sinov jarayonidagi lavhalarni ‘O‘zbekkino’ MA badiiy kengashiga havola etganimizda, ular ham bir ovozdan filmdagi asosiy rollarga tasdiqlangan aktyor va aktrisalarni ma’qullashdi.

Ayni kunlarda ‘Qo‘qon shamoli’ filmining so‘nggi tayyorgarlik jarayonlari bo‘lib o‘tmoqda. Filmning suratga olish ishlari 2019-yilning aprel oyining o‘rtalarida boshlanishi rejalashtirilmoqda.

Dilmurod Masaidov, “Qo‘qon shamoli” filmining rejissori

Ma’lumot uchun, Zebo Qobilovaning “Aybsiz aybdor” deb nomlangan ssenariysi asosida prodyuser Mahmud Erkaboyev hamda rejissor Dilmurod Masaidovlar tomonidan “Qo‘qon shamoli” deb nomlangan tarixiy filmni suratga olmoqda. Film Qo‘qon xonligining XVIII asr oxiri — XIX asr boshlaridagi ijtimoiy-siyosiy hamda adabiy muhiti, o‘sha davr chigalliklari haqida bo‘lib, asosan Qo‘qon xoni Umarxon hamda shoira Nodirabegim hayotidan hikoya qiladi.