«Дарё» жаҳон матбуотида охирги кунларда кўтарилган асосий мавзуларга тўхталиб ўтади.
АҚШ – Россия муносабатлари яхшиланмайди
Рус олигархи ва Путиннинг яқинларидан бири Дерипаска CNBC каналига берган интервьюсида «ҳозирги авлод вақтида Россия – АҚШ муносабатларини яхшилашнинг иложи йўқ», — деб айтди.
Дерипаска АҚШ молия вазирлигини судга бериб, унга қарши киритилган жазо чоралари туфайли, унинг бойлиги 81 фоизга ёки 7,5 миллиард долларга камайганини иддао қилди.
Дерипаска CNBC каналига берган интервьюсида ҳар икки томон мудофаа учун трилионлаб доллар сарфлашга тайёр, лекин унинг ярмига эҳтиёж йўқ, деб айтган. «Кейинги йил АҚШ президентининг ўзгариши Вашинтон ва Москва ўртасидаги муносабатлар, бироз бўлса-да, яхшиланиши мумкинми?», деган саволига «Сиз жиддий сўраяпсизми?» деб жавоб қайтарган.
«Тўрт йилдан кейин ҳам ҳозирги сиёсий вазият қандай бўлса, икки давлат ўртасидаги вазият ўзгармасдан қолади. Ҳозирги авлод жангни яхши кўради, фақат янги авлодгина ниманидир ўзгартириши мумкин», — деган Дерипаска.
Айни пайтда Россия ва АҚШ ўртасида Сурия, Украина, Эрон ва энди Венусуэла масаласида жиддий келишмовчиликлар мавжуд. АҚШ Россияга нисбатан жазо чораларини кучайтираверади.
Кечиримлилик — ислом асоси
New Zealand Herald нашри мамлакатдаги хунрезликдан сўнг мусулмонлар ўзини қандай тутаётганлиги борасида эътиборга молик мақола чоп этди. Мақолада хунрезликдан сўнг омон қолган ва ногиронга айланиб қолган Фарид Аҳмаднинг қуйидаги сўзлари келтирилади:
«Агар унинг (Брайан Таррант) онасини кўрсам, у онаизорга ‘холажон’ деб юзланган бўлар эдим», — деган жабрланувчи.
Қотил ан-Нур масжидида аёллар ва болаларга ҳам шафқат қилмай, уларни отиб ўлдирган. Шу жумладан, Фарид Аҳмаднинг рафиқаси Ҳусни Аҳмад ҳам бир гуруҳ аёл ва болаларни ён эшикдан олиб чиқиб қутқаргач, эрини олиб чиқиш учун қайтганда отиб ташланган.
«Мен мурдалар ва ярадорларни, қоннининг сизиб чиқишини, ваҳимага тушганларни кўрдим…» Қотил 50 кишининг умрига зомин бўлди, кўпчиликни ярадор қилди. Аммо Фарид Аҳмад қотилнинг тоғри йўлга қайтишига умид қилмоқда.
«Кўпчилик мени ақлдан озган деб ўйлаши мумкин, лекин мен чин дилдан гапиряпман. Тилёғламалик қилаётганим йўқ. Имкони бўлганда, мен уни қучар эдим. У хато қилди, инсон хато қилади. Аммо унга нисбатан нафратим йўқ», — деб жавоб берган журналистларга Фарид Аҳмад.
Исломофобиянинг илдизи
«Исломофобия» — исломни ёмон кўриш, ёқтирмаслик, исломдан қўрқиш демак. Dunya Bulteni нашри шу ҳақда мақола эълон қилди.
Ислом омили у пайдо бўлгандан бери мавжуд. Салиб юришларини эсласангиз кифоя. Лекин 1990-йиллардан бошлаб АҚШ ва Европада ислом динига ва мусулмонларга душманларча қараш кучайиб кетди. Бунга асосий сабаб АҚШ ва Европа ҳукмрон доираларига Совет Иттифоқи парчаланиб кетганидан кейин керак бўлиб қолган янги душман қиёфасидаги ислом дини эди.
АҚШнинг дунёда ҳукмронлик қилиш борасидаги даъволари учун албатта «душман» керак. Душман бўлмаса, душманни ўйлаб топишади.
Исломофобия, исломга душманлик асосида ирқчиликни ҳам тарғиб этади, хоҳлаймизми, йўқми, исломофобия ҳам ирқчилик ва исломдан қўрқишнинг аралашиб кетган шаклидир. Мусулмонларни зўравон, зулм етказувчи қилиб тасвирлаш, тоталитар характерга эга деб ҳисоблаш асосида айнан шулар ётади.
Исломга душманликнинг яна бир асосий сабаблари сионизм ва унга яқин бўлган инжилий насороликдир. Бу оқимлар Исроил давлати, унинг арабларга қарши апартеид сиёсатини қўллаб-қувватлаш учун ҳеч қандай воситалардан тап тортмасдан фойдаланишида кўринади. Айни пайтда бутун бошли тизимлар исломофобияни кенг оммага ёйиш мақсадида хизмат қилмоқда. Бунга баҳоналар доим бисёр, бир тафаккур қилинг, аслида «жиҳод» ниқоби остидаги терактлар ортида кимлар турибди?
Инглиз тили устунлигини сақлаб қоладими?
Хитой тилида 1 миллиард 200 миллион, ҳинд тилида 260 миллион, испан тилида 400 миллиондан ортиқ инсон ўз она тилиси сифатида гаплашмоқда. Шундай экан, инглиз тили дунё миқёсида ўз устунлигини сақлаб қоладими?
Тил халқаро миқёсга эга бўлиши учун унда гаплашадиган одамларнинг сонига боғлиқ эмас, деб ёзади Atlanticо нашри.
Тил унинг турли халқ ва элатлар ўртасида муомала тили сифатида ёйилиши сабабли халқаро тилга айланади. Халқаро тилни айнан халқаро тил бўлгани учун ҳам ўрганишади.
Инглиз тили Британиянинг савдо-сотиқдаги устунлиги ва АҚШнинг бугунги кундаги иқтисодиёти эвазига бугунги мақомга эришди деса муболаға бўлмайди. Инглиз тили бугунги кунда, энг аввало, Голливуд, Amazon, Netflix тили сифатида ҳам танилмоқда. Сабаби — интернетдаги мазкур номларнинг у ёки бу турдаги маҳсулотини харид қилишга чоғланар экансиз, сиз инглиз тилидан бохабар бўлишингиз керак, деб ёзилади мақолада.
Инглиз тилли давлатларнинг иқтисодий қудрати сақланиб қолаверар экан, яқин юз – икки юз йил ичида бу тил ўз халқаро аҳамиятини сақлаб қолаверади.
Изоҳ (0)