Тошкент йўловчи вагонларини қуриш ва таъмирлаш заводи ногиронлар учун мўлжалланган янги вагонларни ишлаб чиқаришни йўлга қўйди. Бу ҳақда «Ўзбекистон темир йўллари» матбуот хизмати хабар берди.
Бу 61-931 русумдаги ногиронлар учун махсус купели штаб вагони бўлиб, у мижозлар талаб ва истакларига кўра завод муҳандис-конструкторлари томонидан лойиҳалаштирилган.
Мутахассислар вагонда ногиронлар учун қулайлик яратиш мақсадида вагон ва купенинг кириш қисми, йўлакларни кенгайтирган, ногиронлик аравачасини олиб чиқиш учун махсус кўтарувчи мослама ўрнатган.
Хабарда айтилишича, янги ишлаб чиқарилаётган вагоннинг 60 фоиз бутловчи қисмлари маҳаллийлаштириш дастури бўйича корхонанинг ўзида тайёрланмоқда. Хусусан, иситиш ва совитиш тизимлари, электр бошқарув пульти, юқори ва паст кучланиш махсус электр мосламаси, тележкалар.
Завод шу кунларда ногиронлар учун махсус вагонларни кўргазмасини Қозоғистонда ўтказишни режалаштирмоқда. Шунингдек, халқаро йўналишлардаги поездларида ҳам шу каби жаҳон стандартига мос вагонларни жорий этиш кўзда тутилган.
Изоҳ (0)