Ўзбекистон Миллий матбуот марказида «Ўзбекнефтгаз» АЖнинг «Янги конларни очиш, ишлаб-чиқариш жараёнларига замонавий ускуналар ва технологияларни жалб қилиш орқали углеводород қазиб чиқариш ҳажмларини ошириш» мавзусида матбуот анжумани бўлиб ўтди.
Ҳозирги кунда Ўзбекистон Республикаси ҳудудида 5 та нефтгазли (Устюрт, Бухоро-Хива, Ҳиссор, Сурхандарё ва Фарғона) ва 4 та нефть ва газга истиқболли (Хоразм, Ўрта-Сирдарё, Марказий-Қизилқум ва Зарафшон) регионлари ажратилган ҳамда уларда 270 та нефть ва газ конлари очилган.
Ўзбекистон Республикаси Президентининг 2017 йил 3 ноябрдаги ПҚ-3372 сонли «2017—2021 йилларда ‘Ўзбекнефтгаз’ АЖ бўйича минерал хом-ашё базасини ривожлантириш ва қайта тўлдириш давлат дастурини тасдиқлаш тўғрисида»ги қарорига асосан сўнгги икки йилда 11 нефть ва газ конлари очилиб углеводород хом-ашё захиралари ўстирилди.
Ушбу дастурга асосан 2019 йилда 2D ва 3D сейсмик-қидирув ишларини ўтказиш, 16 та янги объектни бурғулашга тайёрлаш, 15 та янги майдонда бурғулаш ишларини бошлаш ва 85 та излов-қидирув қудуқларини қурилиш билан тугатиш режалаштирилган. Натижада янги углеводород конларини очиш орқали саноат миқёсидаги табиий газ, нефть ва конденсат захираларини ошириш мўлжалланмоқда.
Ушбу жараёнда Устюрт ва Бухоро-Хива регионидаги қуйи юра ва палеозой ётқизиқларини ўрганиш, 3 минг метрда ортиқ чуқурликдаги конларни аниқлашга, маълумотларни илмий тахлил қилиш конлар ва истиқболли объектларнинг уч ўлчамли моделларини тузиш орқали геоллогия-қидирув ишларининг самарадорлигини оширишга мўлжалланган замонавий геофизик ускуналарни ишга тушириш каби йўналишларга алоҳида эътибор қаратилади.
Изоҳ (0)