Ўзбекистон элчиси (қароргоҳи Брюссель шаҳрида) Дилёр Ҳакимов Нидерландия қироли Виллем-Александрга ишонч ёрлиқларини топширди. Бу ҳақда Ташқи ишлар вазирлиги матбуот хизмати маълум қилди.
Маросимдан сўнг бўлиб ўтган суҳбат чоғида Ўзбекистон ва Нидерландия ўртасидаги икки томонлама муносабатларнинг ҳозирги ҳолати ва истиқболлари муҳокама қилинди.
Ўзбекистоннинг Марказий Осиё мамлакатлари ҳамкорлигини фаолллаштириш, Орол денгизи қуриши оқибатларини камайтириш ҳамда Афғонистонда тинчлик, хавфсизлик ва фаровонликни таъминлашга қаратилган саъй-ҳаракатлари таъкидланди.
Нидерландия раҳбари икки мамлакат ўртасидаги муносабатлар, хусусан, қишлоқ хўжалиги, сув ресурсларидан самарали фойдаланиш, илғор технологиялар ва бошқа соҳалардаги алоқаларни янада кенгайтириш ва чуқурлаштириш учун катта салоҳият мавжудлигини таъкидлади.
Қирол Виллем-Александр Нидерландия компанияларининг Ўзбекистонга иккинчи савдо миссиясини ташкил этишини мамнуният билан қўллаб-қувватлади ва икки мамлакат ишбилармон доиралари вакиллари ўртасидаги алоқалар ўзаро манфаатли муносабатларни янада ривожлантириш учун янги имкониятлар очишини билдирди.
Изоҳ (0)