Шимолий Корея ядролардан ҳоли этиш масаласи юзасидан АҚШ билан музокараларни тўхтатиш қарорини кўриб чиқмоқда, деб хабар берди «ТАСС».
Бу ҳақда хорижий давлат элчихоналари ва журналистлар таклиф этилган Пхеньяндаги матбуот анжуманида Шимолий Корея Ташқи ишлар вазирининг ўринбосари Сой Сон Хи маълум қилган.
«Биз қандай шаклда бўлса ҳам Ханойдаги саммитда айтилган АҚШ талабларига ён босиш ниятида эмасмиз. Қолаверса, музокараларни бундай шаклда олиб боришни истамаймиз», — деб таъкидлаган Сой Сон Хи.
ТИВ ўринбосарининг ушбу чиқиши 28 февраль куни Вьетнамда ҳеч қандай келишувга эришилмаган Ким Чен Ин ва Дональд Трамп саммити натижалари баҳоланган биринчи расмий баёнот бўлди.
Сой Сон Хининг айтишича, Ханойдаги музокараларнинг бузилишига натижага эришиш истаги самимий бўлмаган, ўз сиёсий манфаатларини кўзлаган АҚШ сабабчи бўлган. Шимолий Корея делегацияси музокарани реал таклифлар киритиш билан бошлаган. Америка томон эса Ханой келишуви матнига «Шимолий Корея ядровий ишларини қайта бошлаган тақдирда санкциялар яна жорий этилиши шарти билан санкциялар бекор қилиниши мумкин», деган бандни киритишни талаб қилган.
ТИВ ўринбосарининг таъкидлашича, кенгайтирилган тартибда ўтказилган учрашувда АҚШ Давлат котиби Майк Помпео ва Миллий хавфсизлик бўйича президент ёрдамчиси Жон Болтон музокарада душманлик ва ишончсизлик муҳитини келтириб чиқарган ва АҚШ ва Шимолий Корея етакчилари ўртасида конструктив келишувларга эришишга тўсқинлик қилган. Шу сабабли саммит ҳеч қандай натижаларсиз якунланган.
Сой Сон Хиннниг сўзларига кўра, Ким Чен Ин яқин кунларда расмий чиқиш қилиб, муваффақиятсиз якунланган саммитдан сўнг Шимолий Кореянинг келгусидаги ҳаракатлари тўғрисидаги ўз қарорини маълум қилади.
Изоҳ (0)