Ўзбекистонда уй ҳайвонларига паспорт берилади

Ўзбекистонда ҳайвонларни идентификация, яъни ҳисобга олиш ишлари бошлаб юборилди, деб хабар берди ЎзА.

Бузоқ, қўзи, улоқ ва бўталоқ туғилганидан ўн тўрт кун ўтиб, бир ойдан кечикмасдан, қулун ва хўтик тўрт ойлигидан, чўчқа бир ойлигидан, кучук ва мушукча уч ойлигидан ҳисобга олинади.

Бу жараён қорамол, қўй, туя, от, эшак, чўчқа, ит ва мушук каби ҳайвонлар ўртасида амалга оширилмоқда. Ҳар бир ҳайвон турига тақиладиган атрибут тури, ҳайвонларни электрон тарзда ҳисобга олиш ва ҳисобдан чиқариш тизимининг ишлаш жараёнини инобатга олган ҳолда хорижий тажрибалар асосида олиб борилмоқда.

Халқаро эксперт Слобаден Чокревскийнинг фикрига кўра, Ўзбекистонда идентификация қилинган ҳайвонларни ягона электрон маълумотлар базасига киритиш орқали озиқ-овқат маҳсулотлари хавфсизлиги, аҳолини сифатли чорвачилик маҳсулотлари билан таъминлаш, шунингдек, аҳоли ўртасида ҳайвонотга мансуб бўлган турли касалликлар келиб чиқишининг олдини олишга эришиш мумкин. Шунингдек, чорвачилик маҳсулотларининг хорижга экспорт қилинишида бирмунча қулайлик яратиши мумкинлигини алоҳида қайд этди.

Айни вақтда Тошкент вилоятида бу борадаги ишлар бошлаб юборилган. Бунда ҳайвонларга идентификация рақами берилганидан сўнг уч иш куни мобайнида давлат ветеринария хизмати вакили ҳайвон эгасига ветеринария паспортини расмийлаштирмоқда. Бу паспорт туман (шаҳар) ветеринария бўлими бошлиғи томонидан имзоланиб, муҳр босилади.

Ушбу тадбирлар босқичма-босқич бошқа вилоятларда ҳам амалга оширилиши мўлжалланган.