Вазирлир Маҳкамаси томонидан 2018 йилнинг 6 июнида «Ўзбекистон Республикаси Мудофаа вазирлиги ҳарбий хизматчиларини ижтимоий қўллаб-қувватлашга доир қўшимча чора-тадбирлар тўғрисида»ги қарори қабул қилингани ҳақида олдин хабар берилган эди. Мазкур қарор ижроси юзасидан 2018—2019 йилларда Мудофаа вазирлиги қўшинларида муддатли ҳарбий хизматни ўтаган жами 1239 нафар аскарга имтиёзли кредитлар ажратилди. Бу ҳақда вазирлик матбуот хизмати «Дарё»га маълум қилди.
Кеча, 9 март куни Тоифаланган объектларни қўриқлаш қўшинлари қўмондонлигига қарашли ҳарбий қисмлардан бирида дастлабки 59 нафар муддатли ҳарбий хизматчига имтиёзли кредит олиш имконини берувчи сертификатлар тантанали тарзда топширилди.
Тадбиркорлик билан шуғулланишни истаган аскарлар учун ажратилган кредит маблағларининг қиймати ҳозирда 23,5 миллиард сўмдан ортиқроқни ташкил этмоқда.
Муддатли ҳарбий хизматчиларга тадбиркорлик фаолияти бўйича имтиёзли кредитлар улар орасидан саралаб олинган энг фаол ва билимлиларига топширилмоқда. Саралаш икки босқичда олиб борилди — тест ва иншо кўринишида.
Жойлардаги Акциядорлик тижорат «Ўзсаноатқурилишбанк» ва АТ «Халқ банки» томонидан ўтказилган тест синови ва иншо бўйича юқори балл (12 баллдан юқори) тўплаган муддатли ҳарбий хизматчилар билан ўтказиладиган якуний суҳбатдан сўнг, тадбиркорлик фаолияти бўйича имтиёзли кредитларни расмийлаштиришга сертификатлар бериш учун ҳарбий қисм командирига тақдимномалар киритилади.
Тақдимномалар ҳарбий қисмлардан Мудофаа вазирлигига юборилади. Мудофаа вазирлиги қўшинларидаги муддатли ҳарбий хизматчиларга тадбиркорлик фаолияти бўйича имтиёзли кредитлар учун сертификатларни бериш масаласини кўриб чиқиш комиссияси томонидан намуна бўлган муддатли ҳарбий хизматчиларга имтиёзли кредитларга сертификатлар бериш учун ҳарбий қисм командирига киритилган тақдимномалар ўрганиб чиқилади. Комиссия томонидан тегишли қарор қабул қилинади ва баённома нусхаларини ҳарбий қисм қўмондонликларига, Ўзбекистон ёшлар иттифоқининг ҳудудий кенгашлари ва Ўзбекистон банклари ассоциациясига юборилади.
Таъкидлаш керакки, Вазирлар Маҳкамасининг юқоридаги қарори ижроси юзасидан Ўзбекистон Мудофаа вазирлиги, Ўзбекистон ёшлар иттифоқи Марказий кенгаши ҳамда Ўзбекистон банклар ассоциацияси 2018 йил 16 октябрь куни имзоланган қўшма қарор юзасидан муддатли ҳарбий хизматчилар билан тадбиркорлик фаолиятини ташкил қилиш учун кредитлар олиш ҳамда ҳужжатларни расмийлаштириш тартибини тушунтиришга қаратилган амалий машғулотлар жойларда мунтазам олиб борилди.
Изоҳ (0)