Ўзбекистон Республикаси Президенти ҳузуридаги Давлат бошқаруви академиясида Зулфияхоним қизлари сафига 2019 йилда қўшилган иқтидор соҳибалари билан учрашув бўлиб ўтди, деб хабар берди ЎзА.
Унда турли вазирлик ва идоралар, ижодий ва жамоат ташкилотларининг вакиллари, хотин-қизлар қўмиталарининг фаоллари, маънавият тарғиботчилари, ўқувчи ва талаба қизлар иштирок этди.
Мазкур тадбир аввалида иштирокчилар пойтахтнинг Миллий боғ ҳудудидаги Адиблар хиёбонида Ўзбекистон халқ шоири Зулфияхоним Исроилова ҳайкали пойига гуллар қўйди. Таниқли ёзувчи ва шоирлар билан бўлиб ўтган учрашувда қизлар мамлакатимизда миллий адабиётни равнақ топтириш, маданият ва санъат соҳаларини жадал ривожлантириш, ёш истеъдодлар парвозини бундан-да юксалтириш, уларнинг ижодини халққа яқиндан таништириш борасидаги амалий ишларнинг мазмун-моҳияти билан атрофлича танишди.
Тадбирда таъкидланганидек, Зулфия номидаги Давлат мукофотининг таъсис этилиши мамлакат истеъдодли қизлари ҳаётида улкан воқеа бўлди. Бу мукофот иқтидорли қизларни кашф этиш, уларни қўллаб-қувватлаш, орзу-интилишларини амалга ошириш ва жамият ҳаётида янада фаолроқ ва ташаббускорроқ бўлиши учун пухта замин яратади.
«Бундай юксак мукофотга эришганимдан ғоят бахтиёрман. Зулфияхонимдек забардаст, Ватанига, халқига, ўз виждони, ҳаётий қарашларига содиқ бўлган шоира номи билан юритилувчи мукофот билан тақдирланиш биздан ўқишда, ижодда, жамоатчилик ишларида янада масъулиятли ҳамда билдирилган юксак ишончга муносиб бўлишга чорлайди», – дейди Зулфия номидаги Давлат мукофотининг 2019 йилги соҳибаси, Р.Глиэр номидаги Республика ихтисослаштирилган мусиқа академик лицейининг 9-синф ўқувчиси Дилноза Асадова.
Учрашувда иқтидорли қизларга бадиий-ўқув адабиётларидан иборат эсдалик совғалари топширилди.
Изоҳ (0)