Қашқадарёда бир кунда 7 та нодавлат боғча очилди

7 март куни Қашқадарё вилоятида 7 та нодавлат боғча иш бошлади. Бу ҳақда «Дарё» мухбири хабар бермоқда.

Қашқадарё вилоят Мактабгача таълим бошқармаси бошлиғи Асрор Алимардоновнинг маълум қилишича, 7 март куни фаолиятини бошлаган нодавлат боғчаларнинг 4 таси Миришкор туманида очилган бўлса, қолган 3 таси Яккабоғ туманида иш бошлаган.

«Қаровсиз ва ташландиқ ерни олиб, йиллик фоизи 1 фоиз бўлган 1 миллиард 700 миллион сўм кредит олдик ва ишни бошлаб юбордик, — дейди «Ёш билимдон» нодавлат мактабгача таълим муассасаси раҳбари Лазиз Турдиалиев. – Жами 2 миллиард 400 миллион маблағ эвазига замонавий, барча талабларга жавоб берадиган боғчамиз ўз фаолиятини бошлади».

Боғча мудираси Гулноза Қодированинг қўшимча қилишича, мазкур нодавлат боғча очилиши билан 100 нафар бола қамраб олинган. «Шундан 17 нафар кам таъминланган оила фарзандлари ҳам бўлиб, улар учун ойлик тўлов 30 минг сўмни ташкил этса, 8 нафар етим болаларга бепул таълим-тарбия берамиз», — дейди боғча мудираси Гулноза Қодирова.

Мактабгача таълим бошқармаси бошлиғи Асрор Алимардоновнинг маълумот беришича, вилоятда бугунги кунда 665 та боғча мавжуд бўлиб, шундан 312 таси нодавлат боғча ҳисобланади.