O‘zbekiston Respublikasi Prezidenti huzuridagi Davlat boshqaruvi akademiyasida Zulfiyaxonim qizlari safiga 2019-yilda qo‘shilgan iqtidor sohibalari bilan uchrashuv bo‘lib o‘tdi, deb xabar berdi O‘zA.
Unda turli vazirlik va idoralar, ijodiy va jamoat tashkilotlarining vakillari, xotin-qizlar qo‘mitalarining faollari, ma’naviyat targ‘ibotchilari, o‘quvchi va talaba qizlar ishtirok etdi.
Mazkur tadbir avvalida ishtirokchilar poytaxtning Milliy bog‘ hududidagi Adiblar xiyobonida O‘zbekiston xalq shoiri Zulfiyaxonim Isroilova haykali poyiga gullar qo‘ydi. Taniqli yozuvchi va shoirlar bilan bo‘lib o‘tgan uchrashuvda qizlar mamlakatimizda milliy adabiyotni ravnaq toptirish, madaniyat va san’at sohalarini jadal rivojlantirish, yosh iste’dodlar parvozini bundan-da yuksaltirish, ularning ijodini xalqqa yaqindan tanishtirish borasidagi amaliy ishlarning mazmun-mohiyati bilan atroflicha tanishdi.
Tadbirda ta’kidlanganidek, Zulfiya nomidagi Davlat mukofotining ta’sis etilishi mamlakat iste’dodli qizlari hayotida ulkan voqea bo‘ldi. Bu mukofot iqtidorli qizlarni kashf etish, ularni qo‘llab-quvvatlash, orzu-intilishlarini amalga oshirish va jamiyat hayotida yanada faolroq va tashabbuskorroq bo‘lishi uchun puxta zamin yaratadi.
“Bunday yuksak mukofotga erishganimdan g‘oyat baxtiyorman. Zulfiyaxonimdek zabardast, Vataniga, xalqiga, o‘z vijdoni, hayotiy qarashlariga sodiq bo‘lgan shoira nomi bilan yuritiluvchi mukofot bilan taqdirlanish bizdan o‘qishda, ijodda, jamoatchilik ishlarida yanada mas’uliyatli hamda bildirilgan yuksak ishonchga munosib bo‘lishga chorlaydi”, – deydi Zulfiya nomidagi Davlat mukofotining 2019-yilgi sohibasi, R.Glier nomidagi Respublika ixtisoslashtirilgan musiqa akademik litseyining 9-sinf o‘quvchisi Dilnoza Asadova.
Uchrashuvda iqtidorli qizlarga badiiy-o‘quv adabiyotlaridan iborat esdalik sovg‘alari topshirildi.
Izoh (0)