Туркиядан Самарқандга учиб келган йўловчилар дронларни олиб ўтишга уринди

«Истанбул—Самарқанд» йўналиши билан Самарқанд халқаро аэропортига учиб келган фуқаро А.У. «яшил» йўлакдан ҳаракатланаётганда божхоначилар уни белгиланган тартибда холислар иштирокида назоратдан ўтказди. Бу ҳақда «Дарё»га Божхона қўмитаси ахборот хизмати хабар берди.

Натижада унга тегишли бўлган юк сумкасида хорижда ишлаб чиқарилган учувчисиз учиш аппарати яширилганлиги фош этилди.

Шунингдек, айнан шу йўналишда парвозни якунлаб, «яшил» йўлакдан ҳаракатланётган яна бир фуқаро Г.А.нинг сумкаси назоратдан ўтказилганда худди шундай русумли учувчисиз учиш аппаратини яширин равишда олиб кирмоқчи бўлганлиги аниқланди.

Ҳозирда ушбу ҳолатлар юзасидан текширув ишлари олиб борилмоқда.