Жаҳон божхона ташкилоти бош котиби Кунио Микурия Ўзбекистонга келди. Бу ҳақда «Дарё»га Божхона қўмитаси ахборот хизмати хабар берди.
Дастлаб юқори мартабали меҳмон ва Давлат божхона қўмитаси раиси Муроджон Азимовнинг ўзаро учрашуви ўтказилди. Учрашувда асосий эътибор Ўзбекистоннинг Жаҳон божхона ташкилоти ва хорижий давлатлар билан божхона соҳасидаги ўзаро ҳамкорлигини янада ривожлантириш масалаларига қаратилди.
Жаҳон божхона ташкилоти бош котиби Давлат божхона қўмитаси шахсий таркиби иштирокидаги тантанали тадбирда қатнашди. Видеоконференция тарзида бўлиб ўтган мазкур тадбирда Давлат божхона қўмитасининг Қорақалпоғистон Республикаси, вилоятлар ва Тошкент шаҳри бўйича бошқармалари, «Тошкент-Аэро» ихтисослаштирилган божхона комплекси, Миллий кинология маркази ва Божхона институти шахсий таркиби ҳам масофадан туриб иштирок этди.
Бош котиб Ўзбекистоннинг Жаҳон савдо ташкилотига аъзо бўлишга қаратилган аниқ мақсадли ислоҳотларни, бу борадаги очиқ ташқи сиёсатини тўла қўллаб-қувватлашини билдирди. Мамлакатнинг иқтисодий, маданий ва тарихий жиҳатдан минтақада стратегик ўринга эгалигини ҳисобга олиб, Ўзбекистоннинг Жаҳон савдо ташкилотига аъзо бўлишида Жаҳон божхона ташкилоти ҳам ўз ҳиссасини қўшишини маълум қилди.
Тадбир давомида давлат божхона хизмати органларида ўрнак кўрсатиб хизмат қилиб келаётган бир гуруҳ фаол ходимларга Жаҳон божхона ташкилоти бош котиби томонидан имзоланган сертификатлар топширилди.
Тантанали тадбирдан сўнг Кунио Микурия Давлат божхона қўмитаси қошидаги лаборатория ҳамда «Божхона тарихи» музейи фаолияти билан яқиндан танишди. Хавфни бошқариш тизими билан танишиш бош котибда чуқур таассурот қолдирди.
Изоҳ (0)