Ҳиндистон Покистоннинг F-16 самолёти уриб туширилганини маълум қилди

Ҳиндистон ва Покистон бир-бирларининг ҳарбий самолётларини уриб туширди. Бу ҳақда «Эхо Москви» хабар бермоқда.

Ҳинд ҳарбийлари Покистоннинг F-16 самолёти мамлакат ҳаво ҳудудига бостириб кирган деб ҳисобламоқда. Самолёт Покистон ҳудудида қулаган, учувчи катапульта қилишга муваффақ бўлган.

Олдинроқ Покистон томони шу сабаб билан Ҳиндистон ҳарбий-ҳаво кучларининг икки самолёти уриб туширилганини маълум қилганди. Ҳалок бўлганлар ҳақида хабар берилмаган, бир учувчи асир олинган.

Мазкур ҳодисалар Ҳиндистон қирувчи самолётлари Кашмирдаги покистонлик жангарилар лагерига ҳужум уюштирган куннинг эртасига содир бўлди.

ОАВга кўра, ҳозирда Покистонда 5 та, жумладан, пойтахт аэропорти ҳам ёпилган. Ҳиндистонда шимолий ҳудудлардан ўтувчи рейслар бекор қилинган.