Қашқадарё вилоят Давлат солиқ бошқармаси бошлиғи раҳбарлигидаги 4-секторнинг 33 нафар масъул ходимларидан иборат ишчи гуруҳ вилоятдаги 2342 та хонадонда бўлиб, 611 та турли даражадаги муаммоларни аниқлади. Бу ҳақда «Дарё»га вилоят Давлат солиқ бошқармаси масъули Фирдавсий Жабборов маълум қилмоқда.
«Аниқланган муаммоларнинг 76 таси жойида ҳал этилди, — дейди Қашқадарё вилоят Давлат солиқ бошқармаси бошлиғи, 4-сектор раҳбари Қудратали Маматисаев. — Ҳал этилмаган турли мазмундаги муаммолар ижроси юзасидан мутасадди ташкилотларга тегишлилиги бўйича манзилли ва муддатли хатлар юборилиб, ижроси назоратга олинган. Ҳал этилиши муаммоли бўлган масалалар туман, вилоят, республика йўл хариталарига киритилишига тайёрланмоқда».
Вилоят Давлат солиқ мутасаддиларининг айтишича, вилоятда 4-сектор ҳудудида 166 та маҳалла мавжуд бўлиб, қайта ўрганишлар натижасида улардаги хонадонлар сони 126 минг 386 тани, аҳоли сони эса 688 минг 261 нафар кишини ташкил этиши аниқланган.
«Ғузор тумани марказидан 80 километр узоқликда жойлашган «Таҳам», «Жанқара» қишлоғи аҳолиси 200 та газ баллонга муҳтожлигини ёзган, — дейди Қудратали Маматисаев. – Аҳоли шунингдек, қишлоқ врачлик пунктига олий тоифали шифокор, акушер гинеколог кераклигини, қишлоқдаги 3 та трансформатор янгиланиши лозимлигини, таъмирталаб кўприк таъмирланишини сўраб амалий ёрдам сўраган. 4-сектор саъй-ҳаракати билан қишлоқ врачлик пункти олий тоифали шифокор ва бир нафар акушер гинеколог билан таъминланди. 3 та трансформатор мукаммал таъмирдан чиқарилди».
Сектор раҳбарлари 22 февраль куни қишлоқ аҳолисига арзонлаштирилган нархда 400 қоп ун тарқатган. Қишлоқ хўжалиги маҳсулотлари ярмаркаси, аҳоли учун бепул тиббий кўрик ўтказилган. Кам таъминланган 20 та оилага ун, ёғ ва озиқ-овқат маҳсулотлари, уларнинг фарзандларига кийим-кечаклар тарқатилган.
Фирдавсий Жабборовнинг қўшимча қилишича, ушбу қишлоқдаги 6 та уйнинг кадастр ҳужжатлари бепул тайёрлаб берилган.
Изоҳ (0)