Qashqadaryo viloyat Davlat soliq boshqarmasi boshlig‘i rahbarligidagi 4-sektorning 33 nafar mas’ul xodimlaridan iborat ishchi guruh viloyatdagi 2342 ta xonadonda bo‘lib, 611 ta turli darajadagi muammolarni aniqladi. Bu haqda “Daryo”ga viloyat Davlat soliq boshqarmasi mas’uli Firdavsiy Jabborov ma’lum qilmoqda.
“Aniqlangan muammolarning 76 tasi joyida hal etildi, — deydi Qashqadaryo viloyat Davlat soliq boshqarmasi boshlig‘i, 4-sektor rahbari Qudratali Mamatisayev. — Hal etilmagan turli mazmundagi muammolar ijrosi yuzasidan mutasaddi tashkilotlarga tegishliligi bo‘yicha manzilli va muddatli xatlar yuborilib, ijrosi nazoratga olingan. Hal etilishi muammoli bo‘lgan masalalar tuman, viloyat, respublika yo‘l xaritalariga kiritilishiga tayyorlanmoqda”.
Viloyat Davlat soliq mutasaddilarining aytishicha, viloyatda 4-sektor hududida 166 ta mahalla mavjud bo‘lib, qayta o‘rganishlar natijasida ulardagi xonadonlar soni 126 ming 386 tani, aholi soni esa 688 ming 261 nafar kishini tashkil etishi aniqlangan.
“G‘uzor tumani markazidan 80 kilometr uzoqlikda joylashgan “Taham”, “Janqara” qishlog‘i aholisi 200 ta gaz ballonga muhtojligini yozgan, — deydi Qudratali Mamatisayev. – Aholi shuningdek, qishloq vrachlik punktiga oliy toifali shifokor, akusher ginekolog kerakligini, qishloqdagi 3 ta transformator yangilanishi lozimligini, ta’mirtalab ko‘prik ta’mirlanishini so‘rab amaliy yordam so‘ragan. 4-sektor sa’y-harakati bilan qishloq vrachlik punkti oliy toifali shifokor va bir nafar akusher ginekolog bilan ta’minlandi. 3 ta transformator mukammal ta’mirdan chiqarildi”.
Sektor rahbarlari 22-fevral kuni qishloq aholisiga arzonlashtirilgan narxda 400 qop un tarqatgan. Qishloq xo‘jaligi mahsulotlari yarmarkasi, aholi uchun bepul tibbiy ko‘rik o‘tkazilgan. Kam ta’minlangan 20 ta oilaga un, yog‘ va oziq-ovqat mahsulotlari, ularning farzandlariga kiyim-kechaklar tarqatilgan.
Firdavsiy Jabborovning qo‘shimcha qilishicha, ushbu qishloqdagi 6 ta uyning kadastr hujjatlari bepul tayyorlab berilgan.
Izoh (0)