25 февралнинг эътиборга молик янгиликлари — «Дарё» дайжестида.
Бугун, 25 февраль куни АҚШнинг Лос-Анжелес шаҳрида нуфузли «Оскар-2019» мукофоти ўз эгаларига топширилди.
«Оскар» бош соврини «Энг яхши фильм» номинациясида режиссёр Питер Фареллининг «Яшил китоб» фильми ғолиб бўлди.
Нуфузли мукофот тақдимотига юлдузлар ранг-баранг либосларда ташриф буюрди.
***
Ўзбекистонликлар юз минг сўмлик пуллардан фойдаланишни бошлади.
25 февралдан бошлаб Ўзбекистонда юз минг сўмлик купюра муомалага киритилди. Ижтимоий тармоқларда ушбу купюра эгалари томонидан суратга олинган расмлар тарқалди.
***
Ўзбекистон Хотин-қизлар қўмитаси сериалларни тўхтатишга эмас, улардан тўғри хулоса чиқаришга чақирди.
«Сериалларни тақиқлаб қўйиш ҳам мумкин, лекин томошабин истаса қайсидир сериални интернет орқали ҳам томоша қилаверади... Бутун дунёда сериаллар намойиш қилинади. Аввало, биз фарзандларимизни воқеликка мустақил, объектив, танқидий ва таҳлилий муносабатда бўлиб, ҳар қандай вазиятда тўғри хулоса чиқара оладиган қилиб тарбиялашимиз керак», — деди Ўзбекистон Хотин-қизлар қўмитаси раиси ўринбосари Мукаррам Нурматова.
***
Мактабгача таълим вазирлиги Ургутдаги боғчада тарбияланувчининг ўлими бўйича батафсил ахборот берди.
Аввалроқ Ургут туманидаги боғчада 6 ёшли қизча арғимчоқдан йиқилгач, қаровсиз қолиб кетгани, бир кун ўтиб ўзига келмай вафот этгани ҳақида мақола эълон қилинган эди.
Ўзбекистон Мактабгача таълим вазирлиги ишчи гуруҳи томонидан Самарқанд вилояти Ургут тумани 29-сонли мактабгача таълим муассасаси тарбияланувчиси Орзиева Райҳоной Ўринбой қизининг ўлими тафсилотлари ҳар тарафлама, жойига борилган ҳолда ўрганилди.
***
Самарқанд шаҳрининг логотипи муҳокамага қўйилди.
Октябрь ойида Самарқанд вилояти департаменти шаҳарнинг энг яхши туристик логотипи танловини эълон қилган. Уч ой давомида Ўзбекистон, Россия ва АҚШдан эскиз намуналари келиб тушган. Январь ойи бошида шулардан энг яхши саккизтаси танлаб олинган.
Изоҳ (0)