Сенатнинг навбатдаги ялпи мажлисида “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун кўриб чиқилди. Бу ҳақда Сенатнинг матбуот хизмати хабар берди.
Қайд этилишича, кейинги йилларда давлат манфаатларини ҳимоя қилиш ва хавфсизлигини таъминлаш соҳасидаги ижтимоий муносабатларни ҳуқуқий жиҳатдан тартибга солишнинг барқарорлигини таъминлаш, сифати ва самарадорлигини ошириш, шунингдек, республикада аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш соҳасида аниқ мақсадга қаратилган кенг кўламли ишлар олиб бориляпти.
Таъкидланишича, Ўзбекистонда махсус юклар ва ҳарбий таркибларнинг транзити билан боғлиқ рухсатномаларни бериш тартибини соддалаштириш, шунингдек иқлим ўзгариши билан боғлиқ табиий офатлар хавфини камайтириш ҳамда фавқулодда вазиятлар оқибатида етказилган зарарни баҳолаш механизмларини аниқ белгилаш зарурати юзага келаяпти.
Хабарда айтилишича, амалдаги қонунчиликка кўра, транзит учун рухсат бериш ёки рад этиш ариза қабул қилингандан бошлаб 30 кун ичида кўриб чиқиши белгиланган.
“Амалдаги ‘Махсус юклар ва ҳарбий таркибларнинг транзити тўғрисида’ги қонунда транзит рухсатномасини бериш ёки уни беришни рад этиш тўғрисидаги қарор ариза олинган кундан эътиборан 30 кундан ошмайдиган муддатда қабул қилиниши, зарур ҳолларда эса мазкур муддат узайтирилиши мумкинлиги белгиланган. Шу муносабат билан муҳокама қилинган Қонун билан “Махсус юклар ва ҳарбий таркибларнинг транзити тўғрисида”ги қонунга транзит рухсатномасининг амал қилиш муддати кўпи билан 90 кун этиб белгиланмоқда” дейилади Сенат матбуот хизматининг хабарида.
Янги қонун лойиҳасида транзит учун рухсат бериш ёки бермаслик 20 кун ичида кўриб чиқилади. Ушбу муддат узайтиришга сабаб бўладиган омиллар аниқ белгилаб қўйилади.
“Амалдаги қонунчиликдаги бўшлиқларни бартараф этиш мақсадида транзит рухсатномасини бериш ёки уни беришни рад этиш тўғрисидаги қарор ариза олинган кундан эътиборан йигирма кундан ошмайдиган муддатда қабул қилиниши назарда тутилади. Мазкур муддатни узайтиришга асос бўлувчи ҳолатлар ҳамда узайтириш мумкин бўлган муддат чегараси аниқ белгилаб қўйилмоқда”, дейилади хабарда.
Бундан ташқари, қонун билан “Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида”ги қонунга ҳам тегишли ўзгартириш ва қўшимчалар киритилган.
Сенаторлар томонидан қонуннинг қабул қилиниши махсус юклар ва ҳарбий таркибларнинг транзити ҳажмини оширишга, аҳолини ва ҳудудларни фавқулодда вазиятлардан муҳофаза қилиш соҳасидаги муносабатларни тартибга солишнинг ҳуқуқий асосларини мустаҳкамлашга хизмат қилиши таъкидланган.
Муҳокамадан сўнг қонун сенаторлар томонидан маъқулланган.
Изоҳ (0)