Сальвадор президенти Найиб Букеленинг ҳукмрон партияси мамлакат конституциясига ўзгартиришлар киритди. Унга кўра, Букелега чексиз қайта сайланиш ҳуқуқи берилиб, президентлик муддати 6 йилга узайтирилди. Бу ҳақда CNN хабар берди.
Маълум қилинишича, ушбу конституцион ўзгаришлар 31 июль куни қонунчилик палатаси томонидан қабул қилинган. Янги Ғоялар партияси депутати Ана Фигуэроа конституциянинг 5 та моддасига ўзгартириш киритиш бўйича таклиф киритган. Улар орасида сайловнинг иккинчи босқичини бекор қилиш — яъни энг кўп овоз тўплаган икки номзод ўртасидаги ҳал қилувчи сайловни ўтказмаслик ҳам бор. Кўпчиликка эга бўлган Букеленинг партияси бу ўзгартиришларни тезда маъқуллаган — 57 депутат розилик билдирган бўлса, 3 нафари қарши чиққан.
2021 йилда Букеленинг партияси томонидан тайинланган Олий суд судьялари конституцион тақиқ бўлишига қарамай, унинг иккинчи муддатга сайланишини қонуний деб топганди. 2024 йилда эса у йирик фарқ билан қайта сайланган. Эндиликда бу ўзгартиришлар билан Букелега муддатсиз қайта президент бўлиш йўли очилмоқда.
Мухолиф депутат Марсела Виллаторо бу қарорни танқид қилиб, Сальвадорда “демократия ўлганини” айтмоқда. У шунингдек, чексиз президентлик сайлови ҳокимиятни суиистеъмол қилиш, коррупция, “таниш-билишчилик” ва сиёсий иштирокнинг камайишига олиб келишини билдирган.
Фигуэроа бошқа лавозимдагилар, жумладан, федерал депутат ва ҳокимлар ҳам чексиз сайланишга ҳақли эканини айтмоқда. Унинг таклифига кўра, Букеленинг ҳозирги муддати 2029 йил ўрнига 2027 йилга қадар қисқартирилади. Бу эса унга 2 йил олдинроқ яна қайта номзод бўлиш имконини беради. Букеле ҳозирча бу қарор юзасидан изоҳ бермаган.
Президент ўзини “дунёнинг энг замонавий диктатори” деб атаб, жиноятчиликка қарши қатъий сиёсат юритиш ваъдаси билан сайловчилар эътиборини жалб қилмоқда. Гарчи у аввалги ҳукуматлар каби жиноий гуруҳлар билан келишувларда гумон қилинган бўлса-да, кўпчилик фуқаролар мамлакатдаги ижобий ўзгаришлар сабабли бунга кўз юмиб келмоқда.
Изоҳ (0)