Президент ҳузуридаги Оролбўйи халқаро инновация марказининг 6 нафар мутахассиси 20 февраль куни Бирлашган Араб Амирликларининг Дубай шаҳрида жойлашган Шўрланиш шароитида биодеҳқончилик халқаро маркази (ICBA) бош офисига илмий амалиёт ўташ учун жўнаб кетди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Ёш мутахассисларнинг стажировкаси Инновацион ривожланиш вазирлиги томонидан ташкил этилган бўлиб, вазирлик қошидаги Инновацион ривожланиш ва новаторлик ғояларини қўллаб-қувватлаш жамғармаси мутахассисларнинг йўл харажатлари, хорижда яшаш ва кундалик эҳтиёжлари учун сарф-харажатларининг барчасини қоплайди.
ICBA Халқаро маркази эса илмий-техникавий ҳамкор сифатида Халқаро инновация маркази ходимларига виза берилиши, уларнинг Дубай шаҳрида жойлашиши ва илмий стажировкани ташкил қилиш тадбирларини қўллаб-қувватламоқда.
Оролбўйи халқаро инновация маркази мутахассислари БААда қўлланаётган инновацион технологияларни ўрганиб, олган тажрибаларини Оролбўйи ҳудудларини тиклашга қаратилган комплекс ишларни амалга оширишда қўллайди.
Мутахассислар бир ярим ойлик сафар давомида Бирлашган Араб Амирликларининг Абу-Даби шаҳридаги Масдар Сити экошаҳри билан танишади, агробизнес учун муваффақиятли инкубаторларни ташкил қилиш, сув ва тупроқ унумдорлигини ошириш бўйича инновацион технологияларни жорий этиш ва бошқа йўналишларда ўқув-амалиёт курсларини ўтайди.
Изоҳ (0)