«Ўзагротехсаноатхолдинг» Тожикистонда трактор ишлаб чиқаради

Ўзбекистон Республикасининг Тожикистондаги элчиси Эргаш Шоисматов икки томонлама ҳамкорлик истиқболларини, хусусан, қўшма корхоналар ташкил этиш ва машинасозликни ташкил этиш масалаларини муҳокама қилиш учун тожикистонлик ишбилармонлар билан учрашди, дея хабар беради «ASIA-Plus».

Учрашувда ўзбек ва тожик тадбиркорлари кўмир қазиб олиш ва юк ташиш учун ускуналар ишлаб чиқариш бўйича янги ишлаб чиқариш компаниясини ташкил этганлиги қайд этилган.

Тожикистонда қишлоқ хўжалиги техникасини ишлаб чиқаришга ихтисослашган «Ориён Инвест» инвестицион-ишлаб чиқариш компанияси ва «Ўзагротехсаноатҳолдинг» АЖ муассислигида «Ориён Ўзагро» қўшма корхонаси ташкил этилди.Февраль ойининг ўрталарида Душанбе шаҳрида бўлиб ўтган тожик ва ўзбек компаниялари вакилларининг учрашуви чоғида томонлар яқинда Душанбе яқинида ушбу корхона қурилишини бошлашга қарор қилган.

Янги ташкил этилган корхонанинг масъуллари аввалига 120 нафар янги иш ўринлари яратилишини маълум қилган. Ушбу корхонага асосан маҳаллий мутахассислар жалб қилинади. Келгусида қишлоқ хўжалиги техникасини ишлаб чиқаришда кадрларни тайёрлаш учун республиканинг олий ўқув юртлари билан шартнома тузиш режалаштирилган.

Ўзбекистон ва Тожикистон ўртасидаги ҳамкорлик янги даражага етди: ўтган йили ўзбекистонлик инвесторлар Тожикистон иқтисодиётига 5,4 миллион АҚШ доллар сармоя киритган. Бу ҳақда Тожикистоннинг Инвестициялар ва давлат мулкини бошқариш бўйича давлат қўмитаси раиси Фарруҳ Ҳамрализода 12 февраль куни матбуот анжуманида маълум қилди.

Унинг сўзларига кўра, Ўзбекистон сармояси қишлоқ хўжалиги, паррандачилик ва боғдорчиликни ривожлантиришга йўналтирилган.

Расмий маълумотларга кўра, сўнгги тўрт йилда Ўзбекистон билан Тожикистон ўртасидаги товар айирбошлаш ҳажми 14,9 миллион АҚШ долларидан 281,5 миллион АҚШ долларига етган.

Тожикистон ҳукумати қошидаги божхона хизмати раҳбари Хуршед Каримзоданинг сўларига кўра, 2018 йилда Ўзбекистонга 153,3 миллион АҚШ долларлик товар экспорт қилинган.

«Ҳамкорлигимизда ҳали кўп фойдаланилмаган имкониятлар мавжуд. Ушбу суратда давом этадиган бўлсак, тез орада савдо ҳажмини 500 миллион АҚШ долларига етказамиз. Бизнинг салоҳиятимиз камида 1 миллиард АҚШ долларини ташкил қилади», — дейди Ўзбекистон президенти Шавкат Мирзиёев Тожикистон президентининг Тошкентга ташрифи чоғида.