Фарғона вилоятида беморлар учун ажратилган психотроп моддаларни бошқаларга пуллаган психиатр қўлга олинди

Обид Алимов Фарғона вилоятининг Ёзёвон тумани тиббиёт бирлашмасида шифокор-психиатр лавозимида ишлаган. Ўз вазифасига кўра руҳий ҳолати бузилган беморларни даволаб, зарур бўлганида психотроп моддалар кўмагидан фойдаланган. Шифокор Тиббиёт бирлашмаси дорихонасида психотроп моддалар унинг рухсати билан берилишидан ғаразли ниятда фойдаланган. Бу ҳақда ЎзА хабар бермоқда.

О.Алимов психотроп моддаларни сотгани учун суд томонидан тиббиёт соҳасида моддий ва мансабдорлик лавозимларида ишлаш ҳуқуқидан маҳрум этилиб, 2 йил ахлоқ тузатишга ҳукм этилган эди. Шунга қарамасдан у психотроп моддалар савдоси билан шуғулланиш ниятидан қайтмади.

Кунларнинг бирида ушбу туман тиббиёт бирлашмаси шифокори Камол Қосимов (исм-шарифлар ўзгартирилган) О.Алимовга беморига ёзадиган психотроп моддасини биргаликда сотишни таклиф этади ва у мўмай даромад илинжида бунга рози бўлади.

О.Алимов бемори Салтанат Мадиевага «Феназепам 1 мг« психотроп моддасини кўп миқдорда ёзиб, ортиқчасини К.Қосимовга бериб кетишини тайинлайди. Бемор К.Қосимовга 10 дона таблеткадан иборат 1 дона конвалютадаги кўп бўлмаган миқдордаги вазни 0,01 грамм «Феназепам 1 мг« психотроп моддасини сотади.

К.Қосимов эса ушбу психотроп моддасини ўз хизмат хонасида М.Холматовага сотаётганида ҳуқуқни муҳофаза қилувчи орган ходимлари томонидан ушланган.

О.Алимов, К.Қосимов ва С.Мадиева Ўзбекистон Республикаси Жиноят кодексининг 273-модда (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 3-қисми «б» банди билан айбланган.

К.Қосимовга бир йил тиббиёт соҳасида моддий ва мансабдорлик лавозимларида ишлаш ҳуқуқидан маҳрум қилиниб, етти йил озодликдан маҳрум қилиш жазоси тайинланди. С.Мадиевага ҳам етти йил озодликдан маҳрум қилиш жазоси белгиланди. Улар Жиноят кодексининг 72-моддасига кўра, уч йил синов муддати билан шартли ҳукм қилинди.

О.Алимов 2 йил-у 6 ой тиббиёт соҳасида моддий, мансабдорлик ва ҳаким (врач)лик лавозимларида ишлаш ҳуқуқидан маҳрум қилинди. Унга ойлик иш ҳақининг ўттиз фоизини давлат даромадига ушлаб қолган ҳолда уч йил аҳлоқ тузатиш ишлари жазоси тайинланди.