Тошкентдаги йўл ўтказгичлардаги лифтлар нега ишламайди?

Бугун, 20 февраль куни Ахборот ва оммавий коммуникациялар агентлиги пресс-холлида «Ўзбекистонда автомобиль йўллари қурилиши: ютуқ ва муаммолар» мавзусида матбуот анжумани бўлиб ўтди. Бу ҳақда «Дарё» мухбири Севара Нишонова хабар берди.

Тадбирда Ўзбекистон автомобиль йўллари давлат қўмитаси раҳбар ходимлари ОАВ вакилларини қизиқтирган саволларга жавоб берди. Ана шундай саволлардан бири Тошкентдаги йўл ўтказгичлардаги лифтлар нега ишламаслиги ҳақида бўлди.

«Йўл ўтказгичлардаги лифтларга хизмат кўрсатиш шаҳарнинг ободонлаштириш бошқармаси томонидан лифт назоратчиси ёлланиб, у ҳар куни лифтни кўздан кечириб, унинг созлигига масъул бўлиши керак. Чунки бундай лифтлар одамлар нотоғри фойдаланиши, тугмани нотўғри босиши оқибатида бузилиб қолиши мумкин.

Йўл ўтказгичлардаги лифтлар жуда қиммат жиҳоз бўлиб, биз ундан тўғри фойдаланишимиз ва авайлашимиз керак. Қурувчилар йўлўтказгични қуриб топширганларидан кейин уни назорат қилиш эксплуатацион хизматларнинг зиммасига юкланади», — дейди Ўзбекистон автомобиль йўллари давлат қўмитаси раисининг биринчи ўринбосари Шуҳрат Назаров.