Ўтган ҳафта «Дарё» мухбири Миролим Исажоновнинг «Андижон шаҳар ҳокими сектор ҳудудидаги кўчада 1,5 йилдан бери ичимлик суви исроф бўлмоқда» номли танқидий мақоласи эълон қилинган эди. Унда Андижон шаҳрининг «Саноат» маҳалласидаги Неъматжон Умаров ва Гоголь кўчалари кесишмасидан ўтган сув қувури яроқсиз ҳолатга келиб, унинг чириши ва тешилиши натижасида 1,5 йилдан бери тоза ичимлик суви исроф бўлиб, оқиб ётаётгани фотосуратлар билан ёритилганди.
Таҳририятимизга мазкур мақола юзасидан Андижон шаҳар «Сувоқава» филиали раҳбари Ҳ.Алимов имзоси билан ёзилган жавоб хати келди.
«Дарё» сайтида эълон қилинган мақоладан сўнг филиал мутахассислари муаммони яна тегишли тартибда ўрганишди. МФЙнинг Гоголь кўчасидаги ичимлик сув қудуғидаги диаметри д-250 миллиметрли ичимлик сув задвижкаси ҳамда ичимлик сув тармоғи 50–60 йиллар аввал қурилиб, ўз хизмат муддатини ўтаб бўлганлиги сабабли носозликлар келиб чиқаётганлиги аниқланди. Мазкур масаланинг ечимини топиш учун шаҳар ҳудудидаги аҳоли ва бошқа турдаги истеъмолчиларнинг 92% қисмини ёки жами 75 та МФЙларнинг сув таъминотини вақтинчалик тўхтатиб туриш кераклиги туфайли таъмирлаш гуруҳи ишчи ходимлари томонидан бартараф этиш ишлари жорий йилнинг март–май ойларида амалга ошириш режалаштирилмоқда.
Сув қудуғидаги муаммо вақтинча ечим топди. Унинг атрофида ўйилиб, кўлмаклар ҳосил қилаётган чуқурликлар шағалланиб, асфальт ётқизилди», дейилади хатда.
Изоҳ (0)