Ўзбек ошпазлари Ҳиндистонда бўлиб ўтган Халқаро олимпиадада қатнашди

Ўзбекистонлик ошпазлар жамоаси илк бор 5-халқаро «Young Chef Olimpiad» олимпиадасида иштирок этди, дея хабар беради «Nuz.uz».

Мусобақа 29 январдан 2 февралга қадар Ҳиндистонда бўлиб ўтди.

Олимпиаданинг асосий соврини 10 минг долларни қўлга киритиш учун бутун дунёдан талаба ошпазлар иштирок этди. Турнирнинг очилиш маросими Деҳлида, Олимпиаданинг ўзи эса Калькутта, Пуне ва Бангалор шаҳарларида бўлиб ўтди.

Ўзбекистондан Ошпазлик санъати халқаро марказининг икки нафар ошпази иштирок этди. Улар халқаро даражадаги бош ошпаз, мураббий Аҳмаджон Ҳамдамов ҳамда унинг талабаси Убайдулла Султонов.

Миллий жамоа олимпиада мукофотларидан бири «1-раунднинг энг яхши таоми» номинациясида ғолибликни қўлга киритди. Улар қисқичбақали ва балиқли ҳамда вегетарианлар учун таом тайёрлади.

Бундан ташқари, танлов давомида жамоа ўзбек миллий таомлари — ош, сомса ва ҳолвайтар тақдим этди.