Навоий вилоят прокуратураси, вилоят Фавқулодда вазиятлар бошқармаси ҳамда тегишли ташкилотлар билан ҳамкорликда жорий йилнинг 9 февраль куни Айдаркўлда экологик ҳашар ўтказилди. Бу ҳақда вилоят фавқулодда вазиятлар бошқармаси матбуот хизмати хабар берди.
Вилоят Фавқулодда вазиятлар бошқармаси ва туман ташкилотлари билан ҳамкорликда «Айдаркўл» кўли қирғоқлари атрофида йиллар давомида тўпланиб қолган чиқиндилардан тозаланди.
Шунингдек ҳашар иштирокчиларининг саъй-ҳаракати билан Нурота туманининг «Темирқовуқ» маҳалласига қарашли «Чуқурқудуқ», «Қўзибой» ҳамда «Пойга» қишлоқлари ҳудудларида ҳам ободонлаштириш ишлари амалга оширилди.
Экологик ҳашарга вилоят Фавқулодда вазиятлар бошқармаси ва туман ташкилотларидан 148 нафар ходим ва 8 та махсус автомашина жалб қилинди.
«Айдар-Арнасой кўллар тизими» 1969 йилда Сирдарё дарёсининг тошқини ҳамда Қозоғистон Республикасида жойлашган «Чордара» сув омборидан ортиқча сувларнинг чиқариб юборилиши натижасида Арнасой, Айдаркўл ва Тузкон кўлларининг бирлашиши натижасида ташкил топган.
«Айдар-Арнасой кўллар тизими»нинг умумий узунлиги 350 километрни, эни ўртача 45 километрни ҳамда энг чуқур жойи 45 метрни ташкил этиб, 3 700 квадрат километр майдонга эга.
Кўллар тизими Ўзбекистоннинг Навоий ва Жиззах вилоятлари ҳудудларида жойлашган бўлиб, жанубий-ғарбий томони Қозоғистон Республикаси билан чегарадош.
Мазкур кўллар тизимда балиқларнинг 22 тури ва унинг соҳилларида 220 тур қуш ҳамда 7 турдаги судралиб юрувчилар яшайди.
Аввалроқ, «Айдар-Арнасой кўллар тизими»га кирувчи Тузкон кўли яқинидаги учта майдонда Ўзбекистондаги илк атом электр станциясини қуриш бўйича муҳандислик қидирув ишлари амалга оширилаётгани ҳақида хабар берилган эди.
Изоҳ (0)