«Таниш-билишчиликка йўл қўйилмайди». Матёқуб Матчонов «Олтин ҳумо» миллий кинотақдимоти атрофидаги гап-сўзларга ойдинлик киритди (видео)

«Ўзбеккино» МАда Ўзбекистон Киноарбоблари ижодий уюшмаси «Олтин ҳумо» миллий кинотақдимотини ўтказиш юзасидан матбуоат анжумани бўлиб ўтди.

Матбуот анжуманида Ўзбекистон Киноарбоблари ижодий уюшмаси раҳбарияти, режиссёрлар ҳамда ОАВ ходимлари қатори «Дарё» мухбири Феруз Муҳаммад ҳам иштирок этди.

Матбуот анжуманида Ўзбекистон Киноарбоблари ижодий уюшмаси раиси «Олтин ҳумо» миллий кинотақдимоти атрофидаги гап-сўзларга ойдинлик киритди.

Бутун ишчи гуруҳимиз ва саралаш комиссияси номидан шуни айтишим керакки, бизнинг саралаш комиссиямиз фильмларни ўта шаффофлик, ўта ҳаққонийлик билан саралайди. Таниш-билиш, ошна-оғайнигарчилик ёки бўлмаса ўзи ўйнаган фильмни олдинга суриш каби одатлар бўлмайди.

Матёқуб Матчонов саралаш комиссияси раиси бўлганидан сўнг ‘Энг яхши фильм’ номинациясини  ўзи ўйнаган фильмга беради, деган гап-сўзлар ҳам юрибди.

Биринчидан, мен ёмон фильмларда рол ўйнамайман, иккинчидан агар мабодо мен рол ижро этган фильм саралаш комиссиясига топшириладиган бўлса, ўз-ўзидан комиссиямиз хулосасига биноан комиссия ишига аралашмасдан чиқиб кетамиз. Шунинг учун мен сизларга 100% кафолат бераманки ўта шаффофлик ва ҳаққонийлик билан барча фильмларни кўриб чиқамиз ва саралаб оламиз.

Матёқуб Матчонов, Ўзбекистон Киноарбоблари ижодий уюшмаси раиси