Мудофаа вазирлигига қарашли ҳарбий қисм ва муассасалар, олий ҳарбий таълим даргоҳларида буюк аллома, жамоат арбоби, сўз мулкининг султони Алишер Навоий таваллудининг 578 йиллигига бағишланган маънавий-маърифий тадбирлар оммавий равишда ўтказилди. Бу ҳақда вазирлик матбуот хизмати «Дарё»га маълум қилди.
Хусусан, Марказий ҳарбий округ қўмондонлиги ташаббуси билан Жиззах вилоятидаги Маънавият ва маърифат маркази мажлислар залида адабиётшунос олимлар, профессор-ўқитувчилар ҳамда ҳарбий хизматчилар ва ўқувчи-ёшлар иштирокида «Навоийхонлик кечаси» бўлиб ўтди. Жиззах вилояти мусиқали драма театри актёрлари томонидан гавдалантирилган ёш Навоий образи эса йиғилганлар олқишига сазовор бўлди.
Сурхондарё вилоятидаги ҳарбий қисмлардан бирида ўтказилган тадбирда эса шартнома асосида хизмат қилаётган ҳарбий хизматчилар, Жарқўрғон туманидаги 28- ва 57-умумтаълим мактабларининг ўқитувчи ва ўқувчилари иштирокида Навоийнинг нафис ғазалларидан намуналар ўқилди.
Тошкент вилояти Чирчиқ шаҳрида жойлашган Маънавият ва маърифат марказида ўтказилган «Адабиётимизнинг буюк сиймоси» номли назм ва наво кечасида эса кенг жамоатчилик вакиллари, ёзувчи ва шоирлар, талаба ва ўқувчи ёшлар ҳамда адабиёт мухлислари иштирок этди.
Бундан ташқари Қуролли Кучлар академиясида ёш ҳарбий хизматчиларни ор-номусли, қийинчиликлардан қўрқмайдиган, Ватанга содиқ бўлиб, ўз сўзида собит туришида Навоий асарларининг, Навоий меросининг ўрни беқиёслигига бағишланган ижодий тадбир ўтказилиб, унинг шахсини янада чуқурроқ ўрганиш, курсантлар ва тингловчиларнинг Навоий образи ҳақида кўпроқ маълумотга эга бўлишини таъминлаш учун нималарга эътибор қаратиш лозимлиги белгилаб олинди.
Изоҳ (0)