9 февраль — шоир туғилган кун муносабати билан Алишер Навоий номи билан юритилувчи Ўзбекистон Миллий боғида тантанали тадбир бўлиб ўтди. Бу ҳақда ЎзА хабар берди.
Боғ ҳудуди адабиёт мухлислари, сенаторлар, депутатлар, турли вазирлик ва идоралар, ижодий ва жамоат тузилмалари, мамлакатда фаолият кўрсатаётган хорижий дипломатик корпус ва халқаро ташкилотларнинг вакиллари, шоир ва ёзувчилар, шеърият мухлислари, ўқитувчилар,талаба-ёшлар, кенг жамоатчилик билан гавжум бўлди.
Ёзувчилар уюшмаси раиси, халқ шоири Сирожиддин Саййид, Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш марказининг етакчи илмий ходими, филология фанлари доктори Афтондил Эркинов, Алишер Навоий номидаги Тошкент давлат ўзбек тили ва адабиёти университети доценти, филология фанлари номзоди Дилнавоз Юсупова ва бошқалар мамлакатда миллий адабиётга кўрсатилаётган эътибор бой илмий, маънавий меросни ўрганиш, уни тарғиб этиш, қадимий манбаларни мукаммал тадқиқ этган ҳолда нашр эттириш, ижод аҳлига ҳар жиҳатдан кўмак кўрсатиш каби ишларда ўз амалий ифодасини топаётганини таъкидлади.
Буюк Британия музейи қўлёзмалар фонди раҳбари, профессор Майкл Эрдман, Тожикистоннинг Фавқулодда ва мухтор элчиси Имоми Содиқ Ашурбойзода Навоийнинг ижоди асрлар оша дунё адабиёт мухлислари эътиборида бўлиб келаётгани, шоир асарлари дунёнинг бир неча тилларига қайта ва қайта таржима этилиб, мукаммал ўрганилаётганини таъкидлади. Унинг Британия музейида сақланаётган қўлёзма асарлари ва уларни ўрганиш, Ўзбекистон ва Тожикистон ўртасида ривожланиб бораётган маданий-гуманитар йўналишдаги ҳамкорлик, бу борада Абдураҳмон Жомий ва Алишер Навоий ижодий меросининг ўрни ва аҳамиятига оид маърузалар тадбир иштирокчиларида катта қизиқиш уйғотди.
Термиз шаҳрида ташкил этилган Афғонистон фуқароларини ўқитиш таълим марказининг иккинчи курс талабалари Асадулло Азизий, Раъно Шерзод қизи Навоий ғазалларидан намуналарни айтди. Ёзувчилар уюшмаси аъзоси, ёш шоир Жўрабек Жаҳон «Алишер Навоий ҳайкали пойида« номли шеърини ўқиди. «Ниҳол« мукофоти совриндори Шарофиддин Муродов «Гулузорим« қўшиғини ижро этди. Алишер Навоий ҳайкали пойига гуллар қўйилди.
Бу каби тадбирлар, шеърият ва адабиёт, маънавият байрамлари Ўзбекистоннинг барча ҳудудлари, кутубхоналар, таълим масканлари, маҳаллалар, идора ва ташкилотларда бўлиб ўтди.
Изоҳ (0)