9-fevral — shoir tug‘ilgan kun munosabati bilan Alisher Navoiy nomi bilan yuritiluvchi O‘zbekiston Milliy bog‘ida tantanali tadbir bo‘lib o‘tdi. Bu haqda O‘zA xabar berdi.
Bog‘ hududi adabiyot muxlislari, senatorlar, deputatlar, turli vazirlik va idoralar, ijodiy va jamoat tuzilmalari, mamlakatda faoliyat ko‘rsatayotgan xorijiy diplomatik korpus va xalqaro tashkilotlarning vakillari, shoir va yozuvchilar, she’riyat muxlislari, o‘qituvchilar,talaba-yoshlar, keng jamoatchilik bilan gavjum bo‘ldi.
Yozuvchilar uyushmasi raisi, xalq shoiri Sirojiddin Sayyid, Vazirlar Mahkamasi huzuridagi O‘zbekistonga oid xorijdagi madaniy boyliklarni tadqiq etish markazining yetakchi ilmiy xodimi, filologiya fanlari doktori Aftondil Erkinov, Alisher Navoiy nomidagi Toshkent davlat o‘zbek tili va adabiyoti universiteti dotsenti, filologiya fanlari nomzodi Dilnavoz Yusupova va boshqalar mamlakatda milliy adabiyotga ko‘rsatilayotgan e’tibor boy ilmiy, ma’naviy merosni o‘rganish, uni targ‘ib etish, qadimiy manbalarni mukammal tadqiq etgan holda nashr ettirish, ijod ahliga har jihatdan ko‘mak ko‘rsatish kabi ishlarda o‘z amaliy ifodasini topayotganini ta’kidladi.
Buyuk Britaniya muzeyi qo‘lyozmalar fondi rahbari, professor Maykl Erdman, Tojikistonning Favqulodda va muxtor elchisi Imomi Sodiq Ashurboyzoda Navoiyning ijodi asrlar osha dunyo adabiyot muxlislari e’tiborida bo‘lib kelayotgani, shoir asarlari dunyoning bir necha tillariga qayta va qayta tarjima etilib, mukammal o‘rganilayotganini ta’kidladi. Uning Britaniya muzeyida saqlanayotgan qo‘lyozma asarlari va ularni o‘rganish, O‘zbekiston va Tojikiston o‘rtasida rivojlanib borayotgan madaniy-gumanitar yo‘nalishdagi hamkorlik, bu borada Abdurahmon Jomiy va Alisher Navoiy ijodiy merosining o‘rni va ahamiyatiga oid ma’ruzalar tadbir ishtirokchilarida katta qiziqish uyg‘otdi.
Termiz shahrida tashkil etilgan Afg‘oniston fuqarolarini o‘qitish ta’lim markazining ikkinchi kurs talabalari Asadullo Aziziy, Ra’no Sherzod qizi Navoiy g‘azallaridan namunalarni aytdi. Yozuvchilar uyushmasi a’zosi, yosh shoir Jo‘rabek Jahon “Alisher Navoiy haykali poyida“ nomli she’rini o‘qidi. “Nihol“ mukofoti sovrindori Sharofiddin Murodov “Guluzorim“ qo‘shig‘ini ijro etdi. Alisher Navoiy haykali poyiga gullar qo‘yildi.
Bu kabi tadbirlar, she’riyat va adabiyot, ma’naviyat bayramlari O‘zbekistonning barcha hududlari, kutubxonalar, ta’lim maskanlari, mahallalar, idora va tashkilotlarda bo‘lib o‘tdi.
Izoh (0)