Чикаголик ўзбеклар Африкада қудуқ қазиб берди

Чикагодаги ўзбек-америка ассоциацияси фаоллари Камерун аҳолисини ичимлик суви билан таъминлашга ёрдам берди. Бу ҳақда Sputnik хабар берди.

Чикагода яшовчи, ўзгалар муаммосига бефарқ бўлмаган ўзбеклар «Булоқ-3» номли хайрия лойиҳасини молиялаштириш учун маблағ тўплаш бўйича марафонни ишга туширди. Лойиҳа орқали Африка минтақасида сув чиқариш иншоотини ўрнатиш белгиланган эди.

2018 йилнинг август ойига келиб 4500 АҚШ доллари миқдорида маблағ тўплашга муваффақ бўлинди. Бурғиланган қудуқ Камерундаги Бардап аҳоли пунктига ўрнатилган.

«Ушбу лойиҳани қўллаб-қувватлаган барча дўстларимизга миннатдорлик билдираман. Ушбу уюшма аъзоси бўлганимдан фахрланаман», — деб ёзган ўз саҳифасида ассоциация иштирокчиси Фаррух Шамсутдинов.

Бу ассоциация кўмагида Африка мамлакатларида ўрнатилган учинчи қудуқ. Хусусан, ўтган йил май ойида чуқурлиги 4,5 минг метр бўлган артезиан қудуғи Чад республикасининг Васси қишлоғида пайдо бўлган. У ерда 1700 киши истиқомат қилади.

БМТ маълумотларига кўра, бутун дунёда 750 миллион киши тоза ичимлик сувига муҳтож, уларнинг 37 фоизи Африкада яшайди.