Андижонда «Юксак қурилиш савдо» масъулияти чекланган жамияти томонидан 7 қаватли бино қурилиши бошлаб юборилди. Бу ҳақда «Халқ сўзи» хабар берди.
Президентнинг 2018 йил 8 майдаги «Туман (шаҳар) лардаги Халқ қабулхоналари ҳузуридаги Давлат хизматлари марказлари биноларининг давлат-хусусий шерикчилик шартлари асосида қурилишини ташкил этиш тўғрисида»ги қарори ижросини таъминлаш доирасида бошланган бу лойиҳа фойдаланишга топширилгач, унинг биринчи қаватида Давлат хизматлари маркази фаолият бошлайди. Қолган 6 қаватида эса замонавий меҳмонхоналар жойлашади.
3000 метр квадрат майдонга эга бу бино ўзининг шароитлари билан минглаб фуқароларга хизмат қилиб қолмасдан, архитектураси билан шаҳар кўркига файз киритиши кутилмоқда.
Андижон, Олтинкўл, Бўз, Булоқбоши, Марҳамат туманларида ҳам давлат хизматлари марказлари учун ана шундай бинолар қурилиши давом этмоқда ва улар шу йилнинг биринчи чорагида фойдаланишга топширилади.
Изоҳ (0)