Ўзбекистон делегацияси 7—15-февраль кунлари бўлиб ўтадиган Европа кинобозорида илк бор ўз тақдимотлари билан иштирок этади. Мазкур йирик кинематография бизнеси майдончаси «Берлинале», яъни Берлин халқаро кинофестивали доирасида ташкиллаштирилади. Бу ҳақда «Дарё»га Ёшлар медиа маркази маълум қилди.
Ўзбекистон миллий кинокомиссияси ҳамда Европа кинобозори ўртасида эришилган келишувга кўра бу йил киномаркетнинг юзлаб стендлари орасида Ўзбекистон миллий павильони ҳам бўлади. Унда мамлакатнинг тажрибали ва ёш киномутахассисларидан иборат делегация қатнашиб, хорижий кинокомпаниялар вакиллари билан музокаралар ўтказади.
Делегатлар жаҳон киносаноати вакиллари билан Ўзбекистон иштирокида қўшма кинолойиҳалар қилиш (копродакшн) ҳамда чет эл кинокомпанияларини мамлакатга фильмлар суратга олиш учун таклиф қилиш юзасидан ҳамкорлик алоқаларини ўрнатишни мақсад қилган.
Ушбу павильонни ташкиллаштиришда Ўзбекистон ёшлар иттифоқи, «Ўзбеккино» Миллий агентлиги, Кинематографияни ривожлантириш маркази ҳамда Ўзбекистоннинг Германиядаги элчихонаси яқиндан кўмаклашди.
Маълумот учун, Ўзбекистон миллий кинокомиссияси 2018 йилда Президентнинг миллий киноиндустрияни ривожлантиришга доир қарорига мувофиқ ташкил этилганди.
Изоҳ (0)