Тошкентда «Авто саргузаштлар« миллий мультфильмининг премьераси бўлиб ўтди

Алишер Навоий номидаги кино саройида «Ўзбеккино» Миллий агентлиги буюртмасига кўра, Astir Animation studio студияси томонидан суратга олинган 3D форматдаги «Авто саргузаштлар» анимацион фильмининг премьераси бўлиб ўтди. Бу ҳақда ЎзА хабар берди.

«Ўзбеккино» Миллий агентлиги бош директори Ф.Зокиров мазкур фильмнинг ишланиши болажонлар учун кутилган, ҳам кутилмаган воқелик бўлганини таъкидлади. Негаки, миллий анимацион фильмларни ўзбек томошабинлари, айниқса, жажжи ўғил-қизлар интиқлик билан кутган бўлса, янгича, илғор форматда ишланган анимацион картина ўзининг юқори тасвирий сифати, техникавий эффекти билан мультфильмсевар болалар учун чинакам туҳфа бўлди.

Янги анимацион фильмни яратишда истеъдодли рассом, продюсер, техник ижодкор ёшлари фаол ҳисса қўшгани эътиборга моликдир. Картинада кичкинтой Matiz’чанинг саргузаштлари, орзу-интилишлари қувноқ, завқли ва қизиқарли, ҳаётий тарзда ифода этилган.

Йўл ҳаракати қоидаларига қатъий риоя этиш барчанинг бурчи экани билан бирга ўзгаларга хайрихоҳлик, меҳнатсеварлик, бағрикенглик, ҳалоллик каби чин инсоний фазилатлар турли қизиқарли воқеалар воситасида акс эттирилади.

Фильмни саҳналаштирувчи режиссёр Абдулатиф Ҳайдаров, сценарий муаллифи — Исмоил Шомуродов. Зилола Ҳамидова, Жасурбек Бўтаев сингари саҳналаштирувчи рассомларнинг илғор инновацион ёндашуви янги картинага жозибадорлик бағишлаган. Композитор Алексей Извольский басталаган қувноқ қўшиқни «Томоша» болалар бадиий жамоаси маҳорат билан ижро этган. Картинада янграган шеърлар муаллифи — Кавсар Турдиева.