Мажбурий ижро бюросининг Сергели туман бўлими томонидан алимент ундириш тўғрисидаги ижро ҳужжатларининг ижросини таъминлаш жараёнида тарафлар билан ўтказилган ҳуқуқий тушунтириш ишлари натижасида бўлим иш юритувида мавжуд бўлган бир қатор ижро ҳужжатлари бўйича тарафларни ўзаро келиштириб, бирга яшашига эришилди. Бу ҳақда бюронинг Тошкент шаҳар бошқармаси «Дарё»га маълум қилди.
Жумладан; фуқаролик ишлари бўйича Яккасарой туманлараро судининг 14 сентябрь 2018 йилдаги ижро варақасига асосан қарздор А.М.дан ундирувчи Ш.М. фойдасига икки нафар фарзандларининг моддий таъминоти учун учдан бир қисм миқдорида алимент ундириш тўғрисидаги ижро ҳужжати мавжуд бўлиб, Бюронинг Сергели туман бўлими томонидан олиб борилган тарғибот-ташвиқот ишлари натижасида мазкур оиланинг ярашишига эришилди.
Ундирувчи Ш.М. томонидан қарздор билан яна бир оила бўлиб икки нафар вояга етмаган фарзандлари билан бирга яшаётганлиги сабабли туман бўлими ходимларига чин дилдан ташаккурнома тақдим этган.
Фуқаролик ишлари бўйича Яккасарой туманлараро судининг 3 ноябрь 2017 йилдаги ижро варақасига асосан қарздор У.П.дан ундирувчи С.Б. фойдасига бир нафар фарзандининг моддий таъминоти учун тўртдан бир қисм миқдорида алимент ундириш ҳамда юқоридаги суднинг 6 декабрь 2017 йилдаги ижро ҳужжатига асосан қарздор У.П.дан ундирувчи С.Б. фойдасига фарзанди уч ёшга тўлгунига қадар ҳар ойда энг кам ойлик иш ҳақининг бир баравари миқдорида алимент ундириш тўғрисидаги ижро ҳужжатлари мавжуд бўлиб, олиб борилган мажбурий ижро ҳаракатлари шунингдек, тарғибот ҳаракатлари натижасида ундирувчи С.Б. қарздор билан ярашиб вояга етмаган бир нафар фарзанди билан бир оила бўлишига эришилди. Бугунги кунда оила бўлиб яшашмоқда. Фарзанди эса тўкис оила бағрида улғаймоқда.
Бундан таъсирланган, шу ўринда оиласи тикланганига хурсанд бўлган ундирувчи С.Б. томонидан қарздор билан бирга яшаётганлиги сабабли бўлим бошлиғи номига ташаккурнома тақдим этилган.
Фуқаролик ишлари бўйича Яккасарой туманлараро судининг 16 август 2018 йилдаги ижро варақасига асосан қарздор Р.Б.дан ундирувчи О.Б. фойдасига икки нафар фарзандларининг моддий таъминоти учун учдан бир қисм миқдорида алимент ундириш тўғрисидаги ижро ҳужжати Бюронинг Сергели туман бўлими иш юритувига 2018 йил 18 сентябрь куни келиб тушган.
Бюронинг Сергели туман бўлими томонидан олиб борилган тарғибот ишлари натижасида оила ярашиб бугунги кунда бир оила бўлиб яшамоқда.
Бундан ташқари қарздор Ш.Ю.дан ундирувчи С.Ю. икки нафар вояга етмаган фарзандлари билан, қарздор Ш.У. ва ундирувчи Д.У. бир нафар вояга етмаган фарзанди билан биргаликда бир оила бўлиб яшашларига эришилди.
Изоҳ (0)