Шу йилнинг январь ойида Германиянинг Friedensdorf International халқаро хайрия ташкилоти Президент Шавкат Мирзиёевнинг тегишли Фармонига мувофиқ, 1-даражали «Соғлом авлод учун» ордени билан мукофотланди. Бу ҳақда «Халқ сўзи» хабар бермоқда.
Ушбу халқаро хайрия ташкилоти 1967 йилда ташкил топган бўлиб, эллик йилдан ошиқ вақт мобайнида дунёнинг 30 дан кўп давлатлари билан ҳамкорлик қилиб келади. Республика Соғлиқни сақлаш вазирлиги, «Соғлом авлод учун»халқаро хайрия фонди ва Германиянинг Friedensdorf International халқаро хайрия ташкилоти билан 2002 йилда ҳамкорлик шартномасини имзолаган. Ана шу ҳамкорлик доирасида республикадан 12 ёшгача бўлган ва узоқ муддатли бир неча операцияга муҳтож бўлган, кам таъминланган оилаларнинг хаста болалари Германиянинг нуфузли клиникаларига даволанишга юборилади. Бундан ташқари, ҳар йили германиялик тиббиёт мутахассислардан иборат делегация Ўзбекистонга келиб, вилоятларга чиқишади ва аҳолини тиббий кўрикдан ўтказади. Ана шу жараён давомида хорижда даволанишга муҳтож болалар танлаб олинади.
Ҳамкорлик шартномаси имзоланган даврдан буён республикадан 374 нафар бола ана шу мамлакат шифохоналарида операция қилиниб, соғломлаштирилди. Даволаниш жараёнлари 6 ойдан 2 йилгача давом этади.
«Соғлом авлод учун» халқаро хайрия фонди ва Friedensdorf International халқаро хайрия ташкилоти ўртасидаги ҳамкорлик доирасида лаб-танглай туғма нуқсони бўлган ҳамда ортопедик оёқ нуқсони бўлган ҳамда кейинги асоратлари мавжуд бемор болалар республика клиникаларида операция қилиб соғломлаштирилмоқда. Улар Тошкент стоматология институти, Фарғона, Андижон, Самарқанд, Қашқадарё вилоятлари болалар кўп тармоқли тиббиёт марказларида амалга оширилмоқда.
2004 йилдан буён Friedensdorf International халқаро хайрия ташкилоти маблағлари ҳисобига жами 6 минг нафардан зиёд бемор операция қилинди. Бундай хайрия операциялари бугунги кунда ҳам давом этмоқда. Кўплаб бемор болаларнинг дардига малҳам бўлиб, беғараз ёрдам кўрсатилиши инсониятнинг улуғ фазилатидир.
Германиянинг Friedensdorf International халқаро хайрия ташкилоти грант маблағлари ҳисобига 2015 йилдан буён юрак туғма нуқсони бўлган бемор болаларни операция қилиб соғломлаштириш бўйича лойиҳа амалга ошириб келинади. Ана шу лойиҳа доирасида 364 нафар юрак туғма нуқсони бўлган бемор болалар Тошкент педиатрия тиббиёт институти кардиохирургия бўлимида, 71 нафар бола эса Ҳиндистоннинг Artemis Medicare Services Limited клиникасида операция қилиб соғломлаштирилди.Жорий йилнинг февраль ойида яна 10 нафар бемор бола Германиянинг нуфузли клиникаларига даволанишга юборилиши режалаштирилган.
Фонд имзоланган шартномага кўра, 12 ёшгача бўлган бемор ва ногирон болаларни даволаш, реабилитация қилиш масалаларини ижобий ҳал этиб келади. Кейинги ўн йил давомида ўзбекистонлик 250 нафар бемор болалар тери куйиши асоратлари, қўл-оёқ бўғимининг туғма касалликлари ташхиси билан Германиянинг нуфузли шифохоналарида даволаниб қайтди. Бундан ташқари икки юз эллик нафардан ортиқ ногирон бола операция қилинди.
Изоҳ (0)