Кўҳна Бухоронинг Эски шаҳар қисмидаги Мирзо Ғафур кўчасини кенгайтириш ишлари доирасида аҳоли хонадонларига туташ айвонлар бузиб, дарахтлар кесилмоқда. Хонадонлар сув ва электр тармоғидан узиб қўйилди.
Шу йилнинг 21 январь куни тонг саҳарда ҳеч биримизни огоҳлантирмай, асоссиз равишда келиб, нотаниш одамлар реконструкция бошлаймиз, дея кўчабоши айвонларимизни, айримларнинг уйларини йиқитишди. Ҳовлимизни электр энергияси ва сув таъминотидан узиб қўйишди. Қайта созлаб беришни сўраганимизда «Буёғини ўзларингиз тўғрилаб оласизлар», деб эътибор ҳам қилишмади. Чолу кампир уйда ёлғиз яшаймиз. Қўлимиздан нима ҳам келарди. Қўни-қўшниларда ҳам аҳвол шу. «Ҳар ким ўзи созлайди»дан нарига ўтишмайди. Симёғочлардан симлар осилиб ётибди. Кўчанинг ўйдим-чўйдим қилиб ташлангани сув қувурларимизга ҳам шикаст етказган. Бир неча кундан буён хонадонларимизга сув кирмай қолган. Бизнинг ташвишларимиз-ку, майли, аммо ҳудудда жойлашган 42-сонли мактабгача таълим муассасаси ҳам жуда аянчли аҳволда.Мирзо Ғафур кўчаси фуқароси Салима ая Фаёзова
Эрталаб, чамаси, соат олтиларда ўзини таништирмаган кишилар дарвозам тўсинига уланган айвонни бузиб ташлашди. Уйимга яқинроқ жойдаги дарахтларни ҳам кесишди. Ур-йиқитларига эътироз билдирган эдим, инобатга олишмади.Фуқаро Шуҳрат Ғаниев
Фуқаролар мурожаати юзасидан Бухоро шаҳридаги Мирзо Ғафур кўчасига борганимизда кўчада реконструкция ишлари бошланганига гувоҳ бўлдик. Ҳақиқатан, кўчанинг ҳар икки томонида жойлашган хонадонлар олд қисми ковланган. Симёғочлардан симлар осилиб ётибди. Дарахтлар кесилган. Айрим хонадонларга кирувчи электр энергиясини ўтказувчи симлар узиб ташланган.
Реконструкция жараёнида бирорта фуқаронинг яшаш уйи бузилмаган. Фақатгина, бир нечта хонадонларнинг дарвозахонасига туташ қилиб ноқонуний қурилган қўшимча айвонлар бартараф қилинган.
Ноқонуний қурилишларни бузишдан олдин фуқароларга уларнинг қўшимча қурилишлари шаҳарсозлик норма ва қоидаларига мос келмаганлиги учун бузилиши юзасидан огоҳлантириш хатлари берилган. Айрим хонадон эгалари томонидан айвонлар ҳаддан зиёд ноқонуний кенгайтирилган. Оқибатда тор, эгри-бугри кўчалар ҳосил бўлган. Одамларнинг муносиб турмуш кечириши учун мутлақо шароит йўқ эди. Бу ҳолат эски шаҳар қиёфасига ярашмай турган эди. Иккинчи йилдирки, Бухоронинг Эски шаҳар қисмида жуда кенг кўламда бунёдкорлик ишлари бажарилмоқда. Ушбу реконструкция ва ободонлаштириш билан боғлиқ чора-тадбирлар ҳудуднинг замонавий кўринишини таъминлашга қаратилган.Қаҳрамон Дўстов, Бухоро шаҳар ҳокими ўринбосари
Айни пайтда Мирзо Ғафур кўчаси ҳудудидаги 800 метр узунликдаги йўл кенгайтирилиб, реконструкция қилинмоқда. Икки томонлама йўл қуришга тўсиқ бўлган ҳар қандай ноқонуний қурилма, айвонлар, шунингдек, дарахтлар олиб ташланди. Бунёдкорлик ишлари давомида кенг, текис автомобиль йўли, пиёдалар йўлаклари қуриладиИлҳом Мирзоев, «Бухоройўлсаноат» МЧЖ раҳбари
Жорий йилнинг 21 январидан буён Мирзо Ғафур кўчасида кенг миқёсда реконструкция ишлари амалга оширилмоқда. Кўчада тунги ёритиш чироқлари ўрнатилади. Айтиш жоизки, ерости сув қувурларининг ўрнатилиши, симёғочларда янги электр симларининг уланиши, албатта, муҳандислик-коммуникация ишларини бажаришни талаб қилади. Бу ўз-ўзидан электр энергияси таъминотида қисқа узилишлар учрашини келтириб чиқариши табиий ҳол. Электр энергияси тизимида ички ва ташқи узилишлар содир бўлган хонадонларда ҳам созлаш ишлари якунланади. Бу ишлар бирорта фуқаро зиммасига ортиб қўйилмайди. Яқин кунларда аҳоли мутлақо замонавий кўринишдаги бунёдкорлик ишига гувоҳ бўлади.Абдулла Нуруллаев, Бухоро шаҳар электр тармоқлари корхонаси раҳбари
Билдирилишича, Эски шаҳар бўйлаб ҳали мавжуд тарихий обидаларни таъмирдан чиқаришдан ташқари, кўчаларни кенгайтириш ва тиклаш ишлари давом этади.
Изоҳ (0)