Ko‘hna Buxoroning Eski shahar qismidagi Mirzo G‘afur ko‘chasini kengaytirish ishlari doirasida aholi xonadonlariga tutash ayvonlar buzib, daraxtlar kesilmoqda. Xonadonlar suv va elektr tarmog‘idan uzib qo‘yildi.
Shu yilning 21-yanvar kuni tong saharda hech birimizni ogohlantirmay, asossiz ravishda kelib, notanish odamlar rekonstruksiya boshlaymiz, deya ko‘chaboshi ayvonlarimizni, ayrimlarning uylarini yiqitishdi. Hovlimizni elektr energiyasi va suv ta’minotidan uzib qo‘yishdi. Qayta sozlab berishni so‘raganimizda “Buyog‘ini o‘zlaringiz to‘g‘rilab olasizlar”, deb e’tibor ham qilishmadi. Cholu kampir uyda yolg‘iz yashaymiz. Qo‘limizdan nima ham kelardi. Qo‘ni-qo‘shnilarda ham ahvol shu. “Har kim o‘zi sozlaydi”dan nariga o‘tishmaydi. Simyog‘ochlardan simlar osilib yotibdi. Ko‘chaning o‘ydim-cho‘ydim qilib tashlangani suv quvurlarimizga ham shikast yetkazgan. Bir necha kundan buyon xonadonlarimizga suv kirmay qolgan. Bizning tashvishlarimiz-ku, mayli, ammo hududda joylashgan 42-sonli maktabgacha ta’lim muassasasi ham juda ayanchli ahvolda.Mirzo G‘afur ko‘chasi fuqarosi Salima aya Fayozova
Ertalab, chamasi, soat oltilarda o‘zini tanishtirmagan kishilar darvozam to‘siniga ulangan ayvonni buzib tashlashdi. Uyimga yaqinroq joydagi daraxtlarni ham kesishdi. Ur-yiqitlariga e’tiroz bildirgan edim, inobatga olishmadi.Fuqaro Shuhrat G‘aniyev
Fuqarolar murojaati yuzasidan Buxoro shahridagi Mirzo G‘afur ko‘chasiga borganimizda ko‘chada rekonstruksiya ishlari boshlanganiga guvoh bo‘ldik. Haqiqatan, ko‘chaning har ikki tomonida joylashgan xonadonlar old qismi kovlangan. Simyog‘ochlardan simlar osilib yotibdi. Daraxtlar kesilgan. Ayrim xonadonlarga kiruvchi elektr energiyasini o‘tkazuvchi simlar uzib tashlangan.
Rekonstruksiya jarayonida birorta fuqaroning yashash uyi buzilmagan. Faqatgina, bir nechta xonadonlarning darvozaxonasiga tutash qilib noqonuniy qurilgan qo‘shimcha ayvonlar bartaraf qilingan.
Noqonuniy qurilishlarni buzishdan oldin fuqarolarga ularning qo‘shimcha qurilishlari shaharsozlik norma va qoidalariga mos kelmaganligi uchun buzilishi yuzasidan ogohlantirish xatlari berilgan. Ayrim xonadon egalari tomonidan ayvonlar haddan ziyod noqonuniy kengaytirilgan. Oqibatda tor, egri-bugri ko‘chalar hosil bo‘lgan. Odamlarning munosib turmush kechirishi uchun mutlaqo sharoit yo‘q edi. Bu holat eski shahar qiyofasiga yarashmay turgan edi. Ikkinchi yildirki, Buxoroning Eski shahar qismida juda keng ko‘lamda bunyodkorlik ishlari bajarilmoqda. Ushbu rekonstruksiya va obodonlashtirish bilan bog‘liq chora-tadbirlar hududning zamonaviy ko‘rinishini ta’minlashga qaratilgan.Qahramon Do‘stov, Buxoro shahar hokimi o‘rinbosari
Ayni paytda Mirzo G‘afur ko‘chasi hududidagi 800 metr uzunlikdagi yo‘l kengaytirilib, rekonstruksiya qilinmoqda. Ikki tomonlama yo‘l qurishga to‘siq bo‘lgan har qanday noqonuniy qurilma, ayvonlar, shuningdek, daraxtlar olib tashlandi. Bunyodkorlik ishlari davomida keng, tekis avtomobil yo‘li, piyodalar yo‘laklari quriladiIlhom Mirzoyev, “Buxoroyo‘lsanoat” MChJ rahbari
Joriy yilning 21-yanvaridan buyon Mirzo G‘afur ko‘chasida keng miqyosda rekonstruksiya ishlari amalga oshirilmoqda. Ko‘chada tungi yoritish chiroqlari o‘rnatiladi. Aytish joizki, yerosti suv quvurlarining o‘rnatilishi, simyog‘ochlarda yangi elektr simlarining ulanishi, albatta, muhandislik-kommunikatsiya ishlarini bajarishni talab qiladi. Bu o‘z-o‘zidan elektr energiyasi ta’minotida qisqa uzilishlar uchrashini keltirib chiqarishi tabiiy hol. Elektr energiyasi tizimida ichki va tashqi uzilishlar sodir bo‘lgan xonadonlarda ham sozlash ishlari yakunlanadi. Bu ishlar birorta fuqaro zimmasiga ortib qo‘yilmaydi. Yaqin kunlarda aholi mutlaqo zamonaviy ko‘rinishdagi bunyodkorlik ishiga guvoh bo‘ladi.Abdulla Nurullayev, Buxoro shahar elektr tarmoqlari korxonasi rahbari
Bildirilishicha, Eski shahar bo‘ylab hali mavjud tarixiy obidalarni ta’mirdan chiqarishdan tashqari, ko‘chalarni kengaytirish va tiklash ishlari davom etadi.
Izoh (0)