2019 йилнинг 1 февралидан Халқ қабулхоналарининг аҳоли мурожаатлари билан ишлаш бўйича амалдаги тизими билан бир қаторда муаммоларни уйма-уй юриш орқали аниқлаш ва ҳал қилишини, давлат органларининг аҳоли билан бевосита ишлашини назарда тутувчи янги тизим жорий қилинади дея хабар қилди «Дарё» манбаси.
Ҳар қандай ислоҳотнинг амалиётга самарали жорий қилиниши, биринчи навбатда, кадрлар салоҳияти ва малакасини доимий ошириб бориш билан боғлиқлиги сабабли Ўзбекистон Республикаси Президенти ҳузуридаги Давлат бошқаруви академияси билан бирга Халқ қабулхоналари ходимлари учун махсус малака ошириш курсларини ташкил этиш вазифаси топширилган.
Ўзбекистон Республикаси Президенти Администрацияси томонидан Давлат бошқаруви академиясида ташкил этилган малака ошириш ўқув курслари Халқ қабулхоналари институти фаолиятини янги босқичга олиб чиқишдаги яна бир муҳим қадам бўлди.Малака ошириш курслари беш кунлик ўқув-амалий машғулотларидан иборат бўлиб, унда Президент Администрациясининг масъул ходимлари, Қорақалпоғистон Республикаси, Тошкент шаҳри ва вилоятлардаги барча Халқ қабулхоналарининг мудирлари 10 та гуруҳга бўлинган ҳолда ўз билим ва малакасини оширмоқда.Машғулотларда «ақлий ҳужум», кичик гуруҳларда ишлаш, жамоавий муҳокама, тақдимот каби интерфаол усуллардан фойдаланишга алоҳида эътибор қаратилмоқда.Ўқув курсларида Халқ қабулхоналари фаолиятини янгича асосда ташкил этиш, уларнинг секторлар, давлат органлари ва бошқа ташкилотлар билан ўзаро ҳамкорлигини мустаҳкамлаш масаласига катта эътибор қаратилмоқда. Бундан ташқари, ишчи гуруҳ — жамоани шакллантириш ва унинг самарали ишлашини ташкил қилиш, тайм-менежментни амалда қўллаш — ҳар бир сониядан унумли фойдаланиш, аҳоли муаммолари билан ишлаш учун ҳар томонлама кучли тайёрланиш, аҳоли билан самарали мулоқотни йўлга қўйиш усуллари каби мавзуларга ҳам алоҳида эътибор қаратилмоқда. Ҳудудлардаги Халқ қабулхоналарида ўтказиладиган сайёр ўқув машғулотлари билан эса бу борада назария ва амалиёт уйғунлигига эришилади.
Изоҳ (0)