Самарқандда кекса аёлнинг бошига челак кийдириб, мушт туширган йигитларга суд ҳукми ўқилди

2018 йилнинг ноябрь декабрь ойларида ижтимоий тармоқларда бир тўда йигитларнинг кекса аёлнинг бошига челак кийдириб, мушт уриб йиқитгани тасвирланган видеолавҳа тарқалиб, муҳокамалар, баҳс-мунозараларга сабаб бўлган, деб ёзади «Kun.uz».

Ушбу воқеа аслида 2018 йил май ойида, Самарқанд шаҳрининг Сиёб бозори яқинидаги «Шодиёна» савдо мажмуасида юз берган бўлиб, сотувчилар — 1997 йилда туғилган Ширинбек Абдураҳмонов, 1993 йилда туғилган Анвар Мардонов ва 2000 йилда туғилган Дониёр Баҳриддинов шу мажмуада тиланчилик қилиб кун кечирувчи, 1961 йилда туғилган Ҳалима Бўриевани мазах қилиш мақсадида бу ишни амалга оширишган.

Ҳозирда шахси аниқланаётган Раҳматжон исмли йигит челакни аёлнинг бошига кийгизган, Ширинбек Абдураҳмонов эса унга мушт тушириб йиқитган. Йигитлардан бири — Дониёр Баҳриддинов эса буни телефонга тасвирга олиб, кейинчалик интернет орқали тарқатган. Бу ишни амалга оширган зўравонларга нисбатан жиноят иши очилган, прокуратура назорати ўрнатилган эди.

Куни кеча Самарқанд шаҳрида мазкур иш юзасидан сайёр суд бўлиб ўтди, дея хабар берди «Севимли» телеканалининг «Замон» информацион дастури.

Жиноят ишлари бўйича Самарқанд шаҳар суди судьяси Зарифа Аҳмедова берган маълумотларга кўра, сайёр суд мажлиси очиқ тартибда ўтказилган. Суд жараёнида Жиноят кодексининг 277-моддаси 2-қисми «б», «д» бандлари бўйича айбланган Ширинбек Абдураҳмоновга Ёшлар иттифоқи томонидан берилган кафиллик хати, «Боғимайдон» маҳалла фуқаролар йиғини томонидан берилган кафолат хати, жабрланувчининг даъвоси йўқлиги, айбланувчининг қилган ишидан пушаймонлиги инобатга олиниб, шу модда санкциясида назарда тутилган озодликни чеклаш жазоси тайинланган.

Лавҳада судланувчи Ширинбек Абдураҳмонов бу ишидан пушаймонлигини билдириб, кечирим сўраган. Унинг онаси Наргиза Розиқова ҳам омма олдида ўғлининг иши учун кечирим сўраб, фарзандининг 2 ой 13 кун давомида ҳибсда ўтириб, ва ниҳоят суд томонидан озод қилингани туфайли миннатдорчилик билдирган.

Воқеанинг бошқа иштирокчиларига нисбатан қандай жазо белгилангани тўғрисида ҳозирча маълумот берилмаган.