Давлат хавфсизлик хизмати Фарғона вилоят бошқармаси ходимлари томонидан ўтказилган тезкор тадбир давомида «Фарғона—Юқори Водил» йўналиши бўйича ҳаракатланаётган Nexia автомобили «Новкет» маҳалласи ҳудудида тўхтатилди. «Kun.uz»нинг «Ўзбекистон 24» телеканалига асосланиб хабар беришича, машина кўздан кечирилганда, унинг иситиш мосламаси ичида 23 та ўрамда АҚШ доллари борлиги аниқланган.
Маълум бўлишича, ушбу пуллар мазкур машинада кетаётган А.М.га тегишли бўлган. Nexia автомашинаси эгаси, Водил қишлоғида яшовчи А.Д.нинг айтишича, у 50 доллар эвазига А.М.ни Қўқон шаҳрига олиб бориб, ушбу валюталарни олиб келган. Тезкор суриштирув давомида А.Д.нинг яшаш хонадонидан ҳам 24 та ўрамда бўлган АҚШ долларлари олинган. Шунингдек, А.М. ушбу валюталарни Қўқон шаҳрида Ў.Х.дан олганлиги аниқланган ва у ҳам ушланган.
Лавҳада айтилишича, ноқонуний пулларнинг умумий миқдори 1,763 миллион долларни ташкил этган.
Яна бир ҳолат. Қирғизистонда туғилиб ўсган ва ҳозирда Фарғона вилояти Фарғона туманида истиқомат қилувчи 56 ёшли А.Ё.нинг автомашинаси ҳам кўздан кечирилганда, 35 дона ўрам топилди. Улар очиб текширилганда 1 771 650 АҚШ доллари борлиги маълум бўлган. Аниқланишича, Бувайда туманида яшовчи Н.Ж. бу пулларни Тошкентдан Фарғонага келтириб берган. А.Ё. эса уларни ноқонуний йўллар орқали Қирғизистонга ўтказиб бериши керак бўлган.
Ўтказилган тезкор тадбирлар давомида қонунбузарлардан жами 3 534 650 АҚШ доллари ашёвий далил сифатида расмийлаштириб олинган. Ҳозирда мазкур ҳолатлар юзасидан ДХХ Фарғона вилояти бошқармаси томонидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Ушбу пулларнинг ҳақиқий эгаларини аниқлаш бўйича ҳам зарур чоралар кўриляпти.
Изоҳ (0)