Қашқадарёдаги 4 нафар ҳоким 2018 йил фуқаролар билан Халқ қабулхоналарида мулоқот ўтказмаган

2018 йил давомида Шаҳрисабз шаҳри, Китоб, Чироқчи ва Миришкор тумани ҳокимлари ҳудуд аҳолиси билан Халқ қабулхоналарида деярли мулоқот ўтказмаган. Шу сабабли фуқаролар шаҳар ва туманларда ташкил қилинган секторлар фаолиятини кучайтириш зарурлигини айтиб, раҳбар ва масъул ходимларнинг сайёр қабуллари ва уйма-уй юришлари фақат ҳисобот учун бўлиб қолаётгани хусусида билдиришган. Бу ҳақда вилоят ҳокимлиги юридик хизмати раҳбари Абдушукур Омонов «Дарё»га маълум қилди.

Маълум бўлишича, 2018 йил маҳаллий ҳокимият вакилларига (вилоят ҳокимлиги, шаҳар ва туман ҳокимликлари) аҳолидан жами 65 минг 496 та мурожаат келиб тушган бўлиб, уларнинг 29 минг 755 таси Президент виртуал қабулхонаси ва Халқ қабулхонаси орқали тушган.

Виртуал ва Халқ қабулхоналари орқали келиб тушган мурожаатларнинг 4299 таси Қарши шаҳрига, 2927 таси Деҳқонобод, 2709 таси Чироқчи ва 1924 таси Қарши туманига тўғри келади. Ушбу шаҳар ва туманларда мурожаатлар билан ишлашда самарали тизим ташкил қилинмагани сабабли фуқаролар республика ва вилоят идораларига чиқишга мажбур бўлишган.

Фуқаролар асосан уй-жой, уй-жой қуриш учун ер участкаси олиш, ишга жойлашиш, соғлиқни сақлаш, кредит, моддий ёрдам ва нафақа олиш, коммунал соҳадаги камчиликларни бартараф этиш ва аҳоли турмуш шароити билан боғлиқ бошқа масалалар юзасидан мурожаат қилишган.

Вилоятда мурожаатларни қаноатлантириш даражаси 56,2 фоиз бўлганда Қарши шаҳрида 34,2, Шаҳрисабз шаҳрида 35,3, Китоб туманида 36,4 фоизни ташкил қилади. Таҳлиллар мазкур туман ва шаҳарларда мурожаатларнинг ижобий ечимини топишга етарли даражада эътибор қаратилмаганини кўрсатмоқда.

2018 йили виртуал ва Халқ қабулхонаси орқали келиб тушган мурожаатларнинг 2468 таси муддатидан кечиктириб ёпилган. Уларнинг 318 таси Косон, 293 таси Ғузор, 247 таси Миришкор тумани ва 251 таси Қарши шаҳрига тўғри келади. 30 кундан ошиқ муддатда ёпилган мурожаатлар жами 1497 та бўлиб, шундан 203 таси Косон, 183 таси Миришкор туманига, 181 таси Шаҳрисабз шаҳрига ва 178 таси Ғузор туманига тўғри келади.

Шу асосда 2018 йилда мурожаатларни кўриб чиқишда масъулиятсизликка йўл қўйган 98 нафар вилоят, шаҳар ва туман ҳокимликлари масъул ходимларига интизомий чоралар қўлланилган. Бир қанча ходимлар вазифасидан озод қилинган. Айрим раҳбарлар прокуратура идоралари ташаббуси билан маъмурий жавобгарликка тортилган.

Ўтган йилда такрорий мурожаатлар 2763 тани ташкил қилиб, 466 таси Қарши туманига, 456 таси Китоб, 380 таси Касби, 329 таси Ғузор ва 328 таси Яккабоғ туманига тўғри келган.