Ўзбекистонда 26 январь куни эрта тонгдан илк бор умумхалқ экологик хайрия ҳашари бошланди. Бу ҳақда ЎзА хабар берди.
Ҳашардан тушган маблағлар Орол денгизининг суви қуриган майдонларида ҳимоя ўрмонлари ташкил этиш, минтақада экологик ҳолатни ва аҳолининг яшаш шароитини яхшилаш, кам таъминланган, боқувчисини йўқотган, ижтимоий ҳимояга муҳтож оилаларга моддий ва маънавий ёрдам кўрсатиш ишларига сарфланади.
Бугунги кунда мамлакатда Орол денгизининг сувсиз қолган ҳудудида яшил ўрмонлар барпо этишга алоҳида эътибор қаратилмоқда. Агар мустақиллик йилларида Ўзбекистон бўйича 1 миллион 220 минг гектарга яқин ўрмонзор яратилган бўлса, шундан 400 минг гектардан ортиғи айнан Оролбўйи ҳудудида барпо этилган.
Бу масалада қабул қилинаётган махсус дастурга кўра, Орол денгизининг сувсиз ҳудудида келгуси йилда яна 500 минг гектар ўрмонзор барпо этилиши кўзда тутилган. Аҳолининг яшаш шароитини яхшилаш мақсадида Қорақалпоғистон Республикасининг шаҳар ва қишлоқларида янги қурилишлар амалга оширилади. Хусусан, Мўйноқ туманида барча зарур инфратузилмаларга эга бўлган замонавий шаҳарча бунёд этилиши режалаштирилган.
Ўзбекистонда бошланган умумхалқ экологик хайрия ҳашари Оролбўйидаги экологик ҳалокат оқибатларини юмшатиш борасидаги ташаббуслар ва саъй-ҳаракатларни қўллаб-қувватлаш, минтақадаги экоҳолатни ва аҳолининг яшаш шароитларни яхшилашга қаратилгани билан аҳамиятлидир.
Изоҳ (0)