Олий ва ўрта махсус таълим вазирлигида бўлиб ўтган қатор учрашувларда турли давлатлар делегациялари билан таълим соҳасидаги ҳамкорлик масалалари муҳокама қилинди. Бу ҳақда вазирлик матбуот хизмати хабар бермоқда.
Ўзбекистон Республикаси олий ва ўрта махсус таълим вазири И.Мажидов мамлакатда таълимнинг барча босқичида кечаётган ислоҳотларнинг пировард мақсади мамлакат иқтисодий-ижтимоий жабҳалари учун юксак профессионал маҳоратга эга, рақобатбардош кадрларни тайёрлаш эканини таъкидлади.
Acumen Education (Буюк Британия) компанияси ижрочи директори Марк Лабович раҳбарлигидаги делегация аъзолари билан бўлиб ўтган учрашувларда Британия билан олий таълим соҳасида ҳамкорлик алоқаларини мустаҳкамлаш, етакчилик қобилиятларига эга бўлган, замонавий билимлар билан қуролланган етук мутахассисларни тайёрлаш масалалари муҳокама қилинди.
Лаъл Баҳодир Шастри номидаги Ҳиндистон маданият маркази директори, профессор Чандер Шекхар билан бўлиб ўтган учрашувда давлатлар ўртасида олий таълим соҳасидаги ҳамкорликни мустаҳкамлаш масалалари бўйича музокаралар олиб борилди. Учрашув давомида профессор Чандер Шекхар Ҳиндистон олий таълим муассасаларига ўзбекистонлик ёшларни қабул қилиш жараёни бошланганини маълум қилди.
Корея Республикасининг Шинхан университети ҳамширалар коллежи декани Янг Синги, биоэкологик саломатлик коллежи декани Ким Янгсунг билан бўлган учрашувда тиббий таълим, яъни ҳамширалар тайёрлаш ва уларни иш билан таъминлаш борасида ҳамкорлик алоқаларини ривожлантириш масалалари ҳақида батафсил сўз борди.
Мулоқотлар натижасида соҳада халқаро ҳамкорликни тобора кенгайтиришнинг истиқболлари белгиланди.
Изоҳ (0)