Шу кунларда ЮНЕСКО эксперти, Франция шаҳарсозлик институти халқаро алоқалар бўйича менежери Эрик Хойберхтц раҳбарлигидаги делегация Самарқанд шаҳрида бўлиб турибди. Делегация аъзолари вилоят ва шаҳар ҳокимлиги раҳбарлари билан учрашувлар ўтказди, дея хабар беради «Zarnews».
—Таклифимизга биноан Самарқандга келган экспертлардан бир неча масалаларда ҳамкорлик кутяпмиз, — дейди Cамарқанд шаҳар ҳокими Фурқат Раҳимов. — Биринчи навбатда, шаҳар бош режасини расмийлаштиришда ЮНЕСКО экспертининг фикрлари биз учун муҳим. Бундан ташқари, шаҳарнинг муҳофаза остидаги ҳудудида қурилиши мумкин бўлган меҳмонхоналар ва бошқа туристик иншоотлар бўйича маслаҳатлашув кўзда тутилган. Шунингдек, ана шу биноларни ҳужжатлаштиришда ҳам ҳамкорлик қилмоқчимиз.
Йиғилишда ЮНЕСКО эксперти Эрик Хойберхтц мамлакатда тарихий обидаларни муҳофаза қилиш, шаҳарсозлик меъёрлари бўйича мавжуд қонун-қоидалар, ҳукумат қарорлари билан қизиқди. Шундан сўнг, меҳмонлар шаҳар харитаси орқали унинг тарихий қисми, муҳофаза этиладиган ҳудудлар ва уларнинг атрофи билан танишди.
— Самарқанддаги тарихий обидалар дунё аҳамиятига эга ва биз уларни асрашда ҳамкорлик қилишдан манфаатдормиз, — дейди Эрик Хойберхтц. — Шу кунларда меъёрий ҳужжатлар, мавжуд тарихий объектларнинг 3D форматдаги суратлари, тарихий ҳудуддаги бошқа бинолар билан танишяпмиз. Сизлардаги қоидаларга кўра шаҳарнинг тарихий қисмида қурилиши лозим бўлган биноларнинг баландлиги 8 метрдан ошмаслиги лозим экан. Аммо айни шу ҳудудда саноат корхоналари ҳам жойлашган. Бу масалада ҳокимлик билан батафсил фикр алмашамиз.
Йиғилишда Самарқанд шаҳар бош архитектори Ф.Мардонқулов ва шаҳар бош режаси лойиҳачиларидан бири — China Construktion Engineering Design Group Corporation вакили, профессор Сун Сяолун шаҳар бош режаси хусусида саволларга жавоб қайтарди.
Делегация ўз ишини бир ҳафта давом эттириши ва шаҳар бош режаси бўйича фикр алмашилишига келишиб олинди.
Изоҳ (0)