Қирғизистон давлат циркининг 30 дан ортиқ артистлари, жумладан, труппа раҳбарлари ҳам, ишдан бўшаш ҳақида ариза ёзди. Бу ҳақда «Жаш Қирғизистан» труппасининг раҳбари Данияр Болокбаев маълум қилди, деб хабар берди ЎзА.
Унинг сўзларига қараганда, улар ариза билан бирга Маданият вазири Азамат Жаманқуловга турли халқаро конкурсларда қўлга киритилган кубок ва ёрлиқларини ҳам топширишни ният қилишган.
«Вазир уч кун мобайнида тайинланишини ваъда қилган эди. Бугун учинчи кун. Аммо бирор бир иш қилинмади», — дейди Болокбаев.
21 декабрь, душанба куни давлат цирки артистлари парламент биноси олдида митинг уюштирди. Улар салкам икки ойдан бери бош директор тайинланмаётганига эътироз билдиришди ҳамда бу лавозимга цирк артисткаси Аида Акматова номзодини тавсия қилди. Кейинроқ улар маданият, ахборот ва туризм вазирлиги биноси олдида, сал ўтиб эса ҳукумат уйи олдида акция ўтказди. Улар биноларга кириш йўлагига ўзларининг халқаро ва давлат мукофотларини қўйиб чиқди.
Маданият, ахборот ва туризм вазири Азамат Жаманқулов аввалроқ номзодларнинг дастур ва концепцияларини ўрганиш жараёни кетаётганини, бу лавозимга яхши менежер тайинланиши лозимлигини айтган эди.
2004 йилдан бери ишлаб келаётган аввалги директор Қурмангази Исанаев жамоанинг норозилиги туфайли икки ой муқаддам ишдан бўшатилган эди.
Қайд этилишича, Қирғизистон давлат циркига 1962 йилда асос солинган. Ҳозир бу ерда 130 киши ишлайди, уларнинг 40 га яқини – артистлар.
Изоҳ (0)